Austria hmaah Netherlands fiahna

Zanin dar 12:30 hian Euro 2020 match hmasa bera chak pahnih Netherlands leh Austria te an inkhel dawn a, group hmahruaitu zawnna a ni ang. Group C inkhel dangah zanin dar 6:30 hian Ukraine leh North Macedonia te an inkhel bawk ang.

Oranje fiahna
Netherlands-in Matthijs de Ligt an chhawr thei tawh dawn a, Juventus defender De Ligt dam hian team tan phurna a rawn pe ngei ang. Oranje hian match hmasa berah Ukraine an hneh ṭumin attacking game hmuhnawm tak an khel a, amaherawhchu counter attack hmanga nawr let an dawl lo.

Frank de Boer-a hoten hian a goal bawh nat an chhunzawm a, tlarhnung an rem phui bawk chuan an chak ngei a rinawm. Match hmasa berah Gini Wijnaldum, Frenkie de Jong, Stefan de Vrij leh Denzel Dumfries te an khel ṭha tluan a, kum 19 mi Jurrien Timber pawh a rintlak hle.

An formation 3-5-2 an hmang thiam a, ball possesion an ngah phah. Chutihrualin defender pahnih Patrick van Aanholt leh Owen Wijndal te an nghet ṭha tawk lo a, bench-ah hun an hmang a nih pawhin a mak lo ang.

Tlarhma lamah Barcelona zawm tura sawi Memphis Depay leh Wout Weghorst te an hmuhnawm a, Austria tlarhnungte pawhin an ven uluk a ṭul dawn a ni.

Austria tan Alaba
Austria team-a player langsar ber chu David Alaba a ni a, season thara Real Madrid tana khel tur player hi mamawhna apiangah coach Franco Foda-a'n a chhawr.

North Macedonia an hmachhawn ṭumin Alaba hian pass vawi 105 neiin vawi 95 a pass dik a, inkhelh ṭantirhah centre back angin bul ṭan mah se goal mamawh hnuah erawh a nawrtu pawlah a awm.

Alaba hian North Macedonia lakah goal a khung lo a, amaherawhchu minute 78-naah a cross ṭha zet chu Michael Gregoritsch-a'n a khung a, hei hi hmahruaina goal a ni.

Austria hi Netherlands aiin an ṭha lo zawk a, hemi a nih avang hian Alaba hi tlarhnung lamah a awm a rinawm. Chutihrualin Austria player-te hi Bundesliga-a khel an ni fur a, Marcel Sabitzer pawh tunlai midfielder ṭha ber zinga a mi a ni.

Eng nge an sawi?
Netherlands coach Frank de Boer chuan, "Austria hian hma an sawn hle. Alaba chauh ni loin Arnautovic te hi player hriat hlawh an ni a, team inlungrual tak an nih avangin hneh an harsa ang," tiin a sawi.

Austria coach Franco Foda chuan, "Last 16 lut turin point kan la mamawh a, chumi hmu thei tur chuan theihtawp kan chhuah ang. Kan naute theihtawp an chhuah ang a, mellung thar kan phum theih ngei ka beisei," tiin a sawi.

Inlan tura beisei
Netherlands: Stekelenburg; Dumfries, De Ligt, De Vrij, Blind, Wijndal; F de Jong, De Roon, Wijnaldum; Depay, Weghorst
Austria: Bachmann; Lienhart, Alaba, Hinteregger; Lainer, Laimer, Sabitzer, Grillitsch, Ulmer; Baumgartner, Arnautovic