Point mamawh ram pahnih Ukraine vs North Macedonia

Zanin dar 6:30 hian Ukraine leh North Macedonia ten Euro 2021 khelh laia an mach hnihna an khel dawn, team pahnih hi point la hmu lo an nih avangin an tan inkhel pawimawh leh point hlawh chhuah theihna remchang a ni ang.

Ukraine hian Netherlands lakah goal hnih an chhuah hnuah an sut zo thei a, mahse hun tawp dawnah goal an chhuah leh avangin uiawm takin an chak lo. Macedonia erawh Austria lakah 3-0 in an tlawm; an group match hnuhnung berah Dutch team an tum leh dawn.

Ukraine leh North Macedonia te hi an intawn hnuhnung ber chu 2015 khan niin Ukraine lamin hnehna an chang. Zaninah pawh player ropui ni ṭhin, tuna an ram team enkawltu Andriy Shevchenko kaihhruai 'Zbirna' hi chak zawk tura rinkai an ni.

An inpeih
Premier League club West Ham midfielder, Ukraine player pawimawh ni bawk Andriy Yarmolenko chuan, "Kan match hmasa bera kan tih dik loh leh fuh tawk lo laite kan zir chiang tawh a, kan siam ṭhat theih ngei pawh ka ring.

"Coach-in kan tih tur ngun takin min hrilh a, a tih hlawhtlin chu player lam chan a ni. Euro-ah chuan team nem leh chhia a awm thei tawh lo a, eng team pawh hmachhawn dawn ila a ṭha thei ang bera inbuatsaih a ngai," tiin a sawi.

Kum 31 mi Yarmolenko hian Netherlands lakah goal a khung a, zaninah pawh tlarhma lamah Ukraine tan player ṭangkai a nih leh ngei a rinawm. An vice captain hian ram tan match 95 a khelh aṭangin goal 41 a khung tawh, an squad-ah ram tana khung hnem ber a ni hial.

Dutch team an hmachhawn ṭuma hliam tuar midfielder Oleksandr Zubkov a inlan theih a rinawm loh a, Atalanta midfielder Ruslan Malinovskiy leh Manchester City defender Oleksandr Zinchenko te tawnhriat leh theihna chu ram tan a pawimawh zual ang.

Pandev awmna
North Macedonia captain Goran Pandev-a'n Austria laka a goal khung kha inelna liana an ramin goal an neih hmasak ber a ni a, goal a khung lai khan Pandev kha kum 37 leh ni 321 mi a ni tawh.

Inter Milan tana Champions League nomawi pawh chawi tawh hian ram tana a goal khung zawng zawng chu 38 a ni a, tlarhma lama a tlan pui Aleksandar Trajkovski aiin goal 20 zetin a tam zawk - anni pahnih hi Ukraine tlarhnung tan ngaihthah an thiang lo ang.

An ramin Pandev hi an ngaisang a, football team hruaitu ropui mai bakah khawvel huapa an ram tana mi pawimawh leh ṭha bik huangah an dah. A kum a tam deuh tawh avangin a football hun hnuhnung lam a hmang mek.

Macedonia coach Igor Angelovski-a'n Euro ṭan hma khan, "Ka naute hi ka ringtawk a, knock out stage luh kan tum ang," tiin a sawi lawk, last 16 luh an duh a nih chuan zanin hi an tan point hlawh chhuah theihna hun ṭha a ni ang.