Ramos-a'n Real a chhuahsan ta

Real Madrid-in captain Sergio Ramos chhuah tur thu an puan hnuah nimin tlai khan Ramos hian kum 16 a lo cham tawhna club a chhuahsan thu a puang ve ta a, a mittui a dang zo lo.

Ramos chuan, "Ka nuna hun tawn hrehawm ber pawl a ni a, Real Madrid mangṭha hi chu thil harsa tak a ni. Mahse, tunah chuan mangṭha tih a ṭul ta si. Ka pa nen he hmun hi rawn panin bul ka ṭan a nih kha," a ti a, a mittui a tla.

Kum 35 mi Ramos hi Paris Saint-Germain leh amah siam liantu club Sevilla nen sawizawm mek a ni a, a pan tur tak erawh a la chiang thei lo.

Ramos chuan, "Hun hlimawm leh hrehawm ka tawh lai pawha ka bula awm tlat ṭhin ka chhungte chungah lawmthu ka sawi a, coach, teammate leh club-te chungah ka lawm em em a, an puihna tel lo chuan heng zawng zawng hi a thleng thei lo tih ka hria.

"Club-a hnathawk zawng zawng pawh lawmthu ka hrilh a, fan-te chungah ka lawm em bawk. Bernabeu-ah ngei in mangṭhana thu sawi hi ka châk em em a ni. Real Madrid hi ka thinlungah a cham reng ang," a ti.

Real Madrid president Florentino Pérez chuan, "I hnathawh avang hian ka chhuang takzet che a, fan-te tana entawn tlak, hnial rual loha Real Madrid legend i ni," tiin a captain hi a thlah ve bawk.

Spain tan vawi 180 inlana goal 23 khungtu Ramos hian kum 2004 khan Sevilla aṭangin Real hi a zawm a, kum 2015 aṭang khan club captain atan ruat a ni bawk - Real tan inelna hrang hrangah match 671 a khel a, defender ni chungin goal 101 a khung.

Real-ah kum 16 a cham chhungin La Liga (5), Copa del Rey (2), Spanish Super Cup (4), Champions League (4), UEFA Super Cup (3) leh FIFA Club World Cup (4) ah te a champion pui a, khawvela defender ṭha ber ang hiala ngaitu tam tak a nei.