Federer a chak lo

Wimbeldon inbuatsaihna Halle Open-ah Roger Federer a chak lo a, grass court inelna lian hmachhawn tura a inpuahchahna tournament-ah beisei phak loin last 16-ah a zinkawng a tawp.

Nilaini zan inkhelah Federer hi Felix Auger-Aliassime lakah 4-6, 6-3, 6-2 in a chak lo; Swiss star hian a match hmasa zawkah pawh harsa takin hnehna a chang hram a, a vawi hnihnaah erawh a vannei nawn ta lo.

Grand Slam vawi 20 champion tawh hian set hnuhnung berah beisei a phak lo zual, a service ṭha tawk lo chu a tuar - vawi hnih ngawt a service hi a hloh a, player hriat hlawh lo Canadian tlangval tan inkhel chhinchhiah tlak a ni thung.

August thlaa kum 40 tling tawh tur Federer chuan, "Inkhelhna hmuna ka rilru put hmang kha a dik tawk lo a ni. A bik takin set thumnaah khan lehthal theih inrin lohna ka nei tlat a, hetiang rilru neih chuan chak a harsa.

"Point khat chauh hmuh pawh ka harsat em em a, khatiang tur kha a ni ngai lo," tiin a sawi. June 28 aṭanga khelh tur Wimbledon atan erawh ṭha taka inbuatsaihna neih chhunzawm a tum thu a sawi tel bawk.

Hliam vangin Federer hi tun hnaiah a inkhel tam tawk lo, kuminah tournament pathum chiah a la khel. French Open-ah khan khel ṭha viau mah se Wimbledon lam a thlir avangin a lo inhnukdawk tawh a ni.

World number 8 hian tun hnaiah beisei phak lo mah se All England Cup-ah erawh mipui ngaihven hlawh ber a ni leh dawn. Grass court inelna lianah hian vawi riat a champion tawh a, a inkhelh thiamna leh mipuiin an ngaihhlutna hmuh a ni ṭhin.

Halle Open inkhel dangah seeded palina Andrey Rublev chuan Jordan Thompson lakah 6-4, 6-4 in hnehna a chang a, a match lehpekah chuan Corentin Moutet hnehtu Philipp Kohlschreiber nen an inkhel leh ang.