Uruguay hmaah Argentina fiahna

Copa America 2021 champion tura rinkai pahnih Argentina leh Uruguay te chu Inrinni zing dar 5:30 hian Mane Garrincha Stadium, Brasilia-ah an intawng dawn; team pahnih hi eng ang taka ṭha nge an nih chu fiahin a awm dawn.

Group A-ah team panga an awm, an match hmasa zawkah Argentina hi Chile nen an inhnehtawk. Uruguay tan erawh tun inelna atana an match hmasa ber a ni ve dawn chauh, group hmahruaitu nih inchuh tura ngaih an nih avangin an pahnih inkhel hi a pawimawh.

Zanin dar 2:30 hian Chile leh Bolivia te an intawng dawn bawk, Chile tan group hmahruaitu nih theihna kawng a inhawng a, an khingpui Bolivia erawhin point hmasa ber hmuh an beisei ngam ve chauh ang.

Intawn tawhna
South American football thiam ram pahnihte hi tun hmain vawi 189 zet an lo inhmachhawn tawh, record nei ṭha zawk Argentina hi vawi 87 chakin ṭum 57 an tlawm thung; vawi 45 dang chu an inhnehtawk.

Team pahnih intawn hnuhnung ber chu 2019 kha niin 2-2 in an inhnehtawk. Luis Suarez leh Edinson Cavani te goal khung chu Uruguay lamin chakpui dawn niin lang mah se Sergio Aguero leh Lionel Messi ten an sut.

Player hliam leh hrem vanga inlan thei lo tur langsar an nei lo a, tun ṭumah hian coach pahnih ten an duh anga player an rem theih dawn avangin chak zawk tur rinthiam a harsa, inkhel hmuhnawm tak chu an chhawp chhuak ngei ang.

Goal venhim a ngai
Lionel Messi-a'n freekick mawi chhuih lut mah se goal dang an khung belh thei lo a, anmahni lamah a luh zui avangin Argentina hi Chile lakah an chak zo lo; tun hnaiah Lionel Scaloni naute hian an goal an venhim theih loh avangin sawisel an hlawh.

Chile lakah Manchester City defender hlu Nicolas Otamendi leh Lucas Martinez te an inkawp a, tun ṭumah erawh tu emaw zawk zawk hi bench lamah an ṭhut a rinawm; hliam vanga Chile hmachhawn thei lo Cristian Romero a dam tawh.

Serie A club Atalanta defender rinrawl Romero hian season duhawm a hmang zo hlim a ni a, Uruguay lakah a inlan thei a nih chuan 6ft 1in a sang defender hi Albiceleste (Argentina sawina) tana thlamuanpui tham a ni ang.

Tlar hma lamah erawh Messi hoin hming langsar hlir an intlar thei - mahse an match hmasa zawkah khan goal hmaah an hriam tawk lo. Barcelona thiampuipa bulah hian Inter Milan striker Lautaro Martinez aiah Sergio Aguero-a'n bul a ṭan tawh zawk mai thei.

Paris Saint-Germain duhlai pahnih Leandro Paredes leh Angel Di Maria te bakah, midfielder Angel Correa an la nei bawk. Atletico Madrid champion puitu Correa hi goal khung pup pup chi ni lo mah se ṭhiante tana ṭangkai tur chi a ni.

Suarez awmna
Barcelona-in a kum a tam deuh tawh tih vangin nikum nipui lai khan Luis Suarez an hnawl. Uruguay international hian an elpui Atletico Madrid a zawm a, ropui takin La Liga nomawi a chawipui - kum 34 mi hi khelmualah a la chuai lo.

Suarez hi tlarhmaah Edison Cavani nen an inkawp thei dawn. Manchester United striker hian hremna a hmang zo tawh a, ram tana vawi tam a lo fehchhuahpui tawh nen an tlan dun tur hi tlarhnung nem ve tak Argentina tan dan an awlsam lo ang.

Ateltico Madrid striker Suarez chuan, "Kan khingpui turah hian theihna nei sang tak tak an tawm, a bikin an tlarhma a chhah ṭha hle. Mahse, team tin hian chak lohna lai an nei vek, keini pawhin an ṭhat lohna laiah kan bei ang," a ti.

Uruguay manager Oscar Tabarez-a'n tlarhnungah ram tana inlan tam ber Diego Godin (143 caps) a la nei, a kawppui turin tawnhriat nei ṭha tho Jose Gimenez an nei bawk; anni pahnih bakah Martin Caceres an la neih bawk avangin a hnung lam chu an ṭha tawk viau.

Suarez sawi angin team tinin chak lohna lai an nei. Uruguay pawh an chak lohna lai chhut chuan midfield a ni ang. Arsenal aṭanga loan hmanga Atletico Madrid zawmtu Lucas Torreira an nei a, ani hi Real Madrid player Federico Valverde nen an inkawp ang.