Switzerland sawptu Italy-in last 16 an lut
Robert Mancini kaihhruai Italy chu Euro 2020-a last 16 lut hmasa ber an ni. Nilaini zan khan Azzuri hian Switzerland 3-0 in an sawp a, Euro 2020 hawnna inkhelah Turkey 3-0 in an hneh tawh bawk.
Stadio Olimpico, Rome-a inkhelah Azzuri tan Manuel Locatelli-a'n goal hnih a khung a, Ciro Immobile-a'n goal khat a khung ve bawk. Switzerland-in a chhanletna a nei lo a, Italy-in inelna hrang hrangah match hnuhnung 10-ah goal an chhuah an chhuah tawh lo.
Pakhat chiah
Italy-in inhliam vangin Alessandro Florenzi an chhawr thei lo a, right back-ah Giovanni Di Lorenzo a lut. Mancini player dang thlak a nei lo a, chutihrualin hliam vangin Marco Verratti squad-ah a la awm lo.
Switzerland-in Wales nena an inhnehtawk ṭuma player-te bawk an hmang nawn a, tlarhmaah Breel Embolo leh Haris Seferovic te inkawpin Xherdan Shaqiri-a'n a thlawp. Azzuri tlarhnung tan fiahna awm thei tura ngaih a ni.
Mancini hote an ṭha
Italy-in an thiam tih lantir turin hun rei an mamawh lo a, ṭan phat aṭangin an hmuhnawm hle. Mual vei lam aṭangin Leonardo Spinazzola leh Lorenzo Insigne an hmuhnawm a, Switzerland tlarhnung an bet nghal.
Switzerland-in Azzuri tlarhnung an ti buai pha lo a, Italian defender-ten tlarhma lam an thlawp ṭha. Minute 19-na lekah Giorgio Chiellini-a'n corner aṭangin a tauh goal a, mahse VAR hmanga en hnuah pawm a ni lo.
Chiellini a inhliam zui a, Juventus defender thlaktu Francesco Acerbi pawh a khel ṭha nghal. Minute 26-naah Domenico Berardi thawhrah sengin Locatelli-a'n goal hmahruai a khung.
First half-ah goal dang a luh belh lo a, inkhel kalhmanga erawh second half-ah pawh a danglam lo - Italy an chungnung char char. Minute 52-naah Locatelli bawk a rawn lang a, Sassuolo midfielder hian Nicolò Barella hnen aṭanga a ball hmuh chu box pawn aṭangin a khung.
Azzuri tlarhma an hmuhnawm a, tlarhnung pawh a khawng ṭha. Italy keeper Gianluigi Donnarumma-a'n Swiss midfielder Steven Zuber-a goal khung tur a dansak a, Milan keeper hian hna harsa a nei meuh lo.
Italy tlarhmaa awm Ciro Immobile-a'n chance ṭha ṭum hnih a hlah a, ṭum thumnaah erawh mawi takin a khung. Lazio forward Immobile hian box pawn aṭangin minute 88-naah a khung a, 3-0 in an chak.
Eng nge an sawi?
Azzuri hian match 10 chung goal an chhuah lo a ni ringawt lo a, match 29 chhung hneh loh an tawng tawh lo. Roberto Mancini chuan, "Khua a lum a, ni nga chhunga kan match hnihna a nih bawk avangin a harsa. Switzerland khan bul an ṭan ṭha a, mahse pressure na taka kan pek hnuah khan tihsual an nei a, kan khel ṭha zui. Chak phu zawk kan ni," tiin a sawi.
Switzerland coach Vladimir Petkovic chuan, "Italy ka lawmpui e. Football ropui tak an khel a, kan tluk lo deuh a ni. Ka team-te bulah match khat khelh tur a la awm thu ka hrilh a, point thum kan hmuh chuan last 16 kan lut ang," tiin beisei an la neih thu a sawi.
Tute nge inlan?
Italy: Donnarumma; Di Lorenzo, Bonucci, Chiellini (Acerbi 24), Spinazzola; Barella (Cristante 87), Jorginho, Locatelli (Pessina 86); Berardi (Tolói 70), Immobile, Insigne (Chiesa 69)
Switzerland: Sommer; Elvedi, Schär (Zuber 58), Akanji; Mbabu (Widmer 58), Xhaka, Freuler (Sow 84), Rodríguez; Shaqiri (Vargas 76); Embolo, Seferović (Gavranović 46)
