Bale-a'n Wales a chakpui

Wales-in Nilaini zan khan Baku-ah Turkey 2-0 in an hneh a, Euro 2020 last 16 an hnaih. Dragons (Wales) tan hian Aaron Ramsey leh Connor Roberts ten goal an khung a, goal hnih hi captain Gareth Bale-a siamsak ve ve a ni.

Group A aṭangin Italy an tling tawh a, Wales hian June 20, Pathianni zan hian group match hnuhnung berah Azzuri an hmachhawn dawn. Rob Page-a hote tan last 16 lut chiang turin Italy chelh a tawk a, chak lo pawh ni se knockout stage an luh hi a rinawm tawh zawk.

Baku Olympic Stadium-ah Wales-in bul an ṭan ṭha zawk a, Arsenal midfielder hlui Ramsey hian chance ṭha ṭum hnih ngawt a hlah hnuah minute 42-naah goal hmahruai a khung.

Second half ṭantirhah point mamawh Turkey an che ṭha a, captain Burak Yilmaz-a'n chance ṭha a hlah. Wales keeper Danny Ward-a'n Merih Demiral goal khung tur ṭha takin a dang bawk.

Wales captain Bale-a'n Zeki Celik laka a penalty hlawhchhuah chu chiang takin a pet over a, hna a harsat phah. Amaherawhchu chak phu zawk Wales tan player thawkrim Connor Roberts-a'n injury time-ah chak nemnghetna goal a khung a, Bale-a siamsak tho a ni.

Inkhelhna hmun Azerbaijan khawpui Baku hi Turkey ram ṭhenawm a ni a, entu 30,000 zet an awm avangin Senol Gunes-a hote tan home match ang hiala ngaih theih ni mah se Wales-in point thum hlu tak an hlawh chhuak.

Wales manager Rob Page chuan, "Dan James, Aaron Ramsey, Gareth Bale, Kieffer Moore te kan nei a, khingpuite tlarhnung tan chuan hnawksak tham a tling. Bale kha a khel ṭha takzet a, chutihrualin tihsual chu a awm ve tur a ni. Ka naute ka chhuang takzet," tiin an khelh danah a lungawi thu a sawi.

Turkey coach Senol Gunes chuan, "Wales khan bul an ṭan aṭha a, mahse kan insiamṭha a, siphurh sut theihna hun ṭha pawh kan nei, kan vannei tawk lo a ni," tiin point hlawhchhuah an phu thu a sawi ve bawk.

Player inlante
Turkey: Ugurcan Cakır; Zeki Celik, Kaan Ayhan, Caglar Söyüncü, Umut Meras (Mert Muldur 72); Kenan Karaman (Halil Dervisoglu 75), Hakan Calhanoğlu, Okay Yokuslu (Merih Demiral 46), Ozan Tufan (Yusuf Yazıcı 46), Cengiz Under (Irfan Can Kahveci 83); Burak Yilmaz
Wales: Ward; Roberts, Mepham, Rodon, B Davies; Morrell, Allen (Ampadu 73) Bale, Ramsey (Wilson 85), James (N Williams 90+4); Moore