Vawiin aṭangin World Test C'ship final India Vs New Zealand
Vawiin tlai dar 3:00 hian Ageas Bowl, Southampton-ah India leh New Zealand ten World Test Championship final an khel dawn. Virat Kohli hoten Test champion hmasa ber nih theihna hun ṭha an nei a ni.
Test C'ship chu
ICC World Test Championship hmasa ber hi August 1, 2019 aṭang khan khelh ṭan a ni a, ram pakua an tel. Inelna hmachhawn ram te chu Australia, Bangladesh, England, India, New Zealand, Pakistan, South Africa, Sri Lanka leh West Indies te an ni.
Test khel ram zingah Afghanistan, Ireland leh Zimbabwe te an tel ve lo. Inelna hmasa ber leh a vawi hnihnaah ram inhal pahnih India leh Pakistan te chu inkhel lo turin ruahmanna an siam.
Test Championship hi a hranpa khelh a ni lo a, Test match an khelh ṭhin pangngai chu awmze nei zawka fixture siamin an result a zirin point an hlawh chhuak zel. India hian championship hun chhung hian series vawi ruk an khel hman a, vawi nga chakin vawi khat an chak lo.
Virat Kohli hote hian match 17 an khel a, match 12 chakin vawi li an chak lo a, vawi khat inhnehtawkin league round-ah pakhatna an ni. Pahnihna New Zealand hian series vawi nga an khelhah vawi thum an chak a, vawi khat chak loin vawi khat an inhnehtawk.
Black Caps hian match 11 an khelh aṭangin vawi sarih an chak a, vawi li chak loin inhnehtawk an nei lo. India leh New Zealand hnuaiah Australia leh England te an awm a, amaherawhchu final chiah a awm avangin ram pahnih dangte erawh inkhelh ngai tawh loin pathumna leh palina a ni nghal.
Final chu
Test match hi ni nga chhung khelh a ni a, innings vawi hnih a awm. Ni nga chhunga chak zawk an awm lo a nih chuan inhnehtawkah puan ṭhin a ni.
Final-ah hian team pahnihte hi an inhnehtawk a nih chuan joint champion an ni dawn. Champion team hian dollar maktaduai 1.6 an hlawh dawn a, a chak lo zawkin $800,000 an dawng ang. An inhnehtawk erawh chuan team pahnih hian dollar maktaduai 2.4 an insem ang.
India hian 2019 Cricket World Cup semifinal-ah New Zealand an hneh lo a, tun ṭuma Virat Kohli hote leh Kane Williamson te inkhel tur hi final duhthusam tiha sawi theih a ni. Men in Blue batting ṭhat zia sawi nawn a ngai tawh lo a, bowler ṭha mi Ravichandran Ashwin leh Jasprit Bumrah te an kawl bawk avangin champion thei turin an ṭha tawk.
Chutihrualin New Zealand hian Ross Taylor, Henry Nicholls te an kawl bakah bowler ṭha Tim Southee leh Trent Boult te an nei a, India tan awlsam taka chak theih a ni lo ang.
Final khel tur squad
India: Virat Kohli (c), Ajinkya Rahane (VC), Rohit Sharma, Shubman Gill, Cheteshwar Pujara, Hanuma Vihari, Rishabh Pant, Wriddhiman Saha, Ravichandran Ashwin. Ravindra Jadeja. Jasprit Bumrah, Ishant Sharma, Mohammad Shami, Umesh Yadav, Mohammad Siraj
New Zealand: Kane Williamson (c), Tom Blundell, Trent Boult, Devon Conway, Colin de Grandhomme, Matt Henry, Kyle Jamieson, Tom Latham, Henry Nicholls, Ajaz Patel, Tim Southee, Ross Taylor, Neil Wagner, BJ Watling, Will Young