Arsenal-in Villa dilna an hnawl

Arsenal chuan Aston Villa hnen aṭangin midfielder Emile Smith Rowe lei dilna an dawng a, mahse Villa lamin pound maktaduai 25 an rawn tawktarh chu an lo hnawlsak.

Villa hian nikum nipui lai ang bawkin squad thuam chak an tum. Argentine midfielder Emiliano Buendia chu Norwich City aṭangin pound maktaduai 33-in an lei fel tawh a, team ti chak thei tur an la melh zel.

Gunners hian an midfielder kum 20 mi Smith Rowe hi hralh tumna an nei lo, an academy chhuakin contract a neih lai hi kum 2023 thleng daih niin tunah hian pawtsei tura hmalak mek a ni.

Mikel Arteta pawhin a squad thuam chak a tum mek. Leicester City midfielder James Maddison an hel mek a, English midfielder la chhuak tur erawh chuan sum an hman hnem deuh a ngai dawn.

David Luiz hmun ruak luah tur pawhin Brighton defender Ben White an ngaihven a, Championship lama tla ta Sheffield United goalkeeper Aaron Ramsdale nen pawh an sawi zawm mek bawk.