Trippier manah Man United inseng huai lo

Manchester United chuan England defender Kieran Trippier lakluh an duh a, amaherawhchu English club hian Atletico Madrid chhiarna man zat pound maktaduai 20-in an lei ngam lo.

Burnley leh Tottenham defender hlui Trippier hian season liam ta khan La Liga-ah Atletico a champion pui a, Diego Simeone hnuaiah hmun pawimawh chang mah se a chhungte awmna England hmar thlang lama awm a duh avangin Manchester United zawm hi a duh.

Man United boss Ole Gunnar Solskjaer pawhin England tana khel pha Trippier hi a dah sang hle. Amaherawhchu Trippier hian kumin September thlaah kum 31 a tling dawn a, season khat chauh contract a neih tawh avangin English club hian Atletico pawisa beisei zat sum an thehchhuak phal lo.

Khawthlang media-te chuan Trippier-a release clause hi pound maktaduai 34 (€40m) niin an ziak a, Atletico phalna zat aiin a la tam zawk. Euro 2020-a England-in Croatia an hneh ṭumin Trippier hian left back-ah bul a ṭan a, English defender hi ball a pet thiam bakah ding lamah a khelh tam zawk avangin Man United hian Aaron Wan Bissaka thlak nan an hmang theih dawn. Man United hian Trippier hi an duh tak tak a nih chuan Spanish club phalna zat sum an thehchhuah a ṭul ang.