Murray leh Williams tan wildcard

June 26 aṭangin Wimbledon khelh a ni dawn, inelna buatsaihtute chuan tun hma lama player hlawhtling lo ni tawh Andy Murray leh Venus Williams te chu kumin atan hian wildcard an pe.

Murray leh Venus hi an ranking a hniam avangin qualifying khelh ngai tur zinga mi an ni. Mahse, tournament thuneitu lamin an duhsak bik tan wildcard an pe ṭhin a, kuminah hian duhsakna dawngtu zingah an tel.

Britain tangval Murray hian 2013 leh 2016 khan All England Club-ah hian hlawhtlinna a lo chang tawh, American star Venus phei chuan grass court inelna lianah hian vawi nga ngawt nomawi a lo chawi tawh a ni.

Mipa singles huangah hian Murray bakah tualchhung player dang pathum Liam Broady, Jay Clarke leh Jack Draper ten wildcard an dawng a, anni bakah hian Spanish rawlthar Carlos Alcaraz chu duhsak zingah a tel bawk.

Wimbledon khel tura tarlan zingah hian Naomi Osaka pawh a tel. Hmeichhe singles world number 1 hian rilru lamah harsatna (depression) a nei a, hei vang hian French Open an khelh lai pawhin a lo inhnukdawk tawh.

Wimbledon chief executive Sally Bolton chuan, "Tun thleng chuan Naomi hian inlan loh a tum thu a la sawi lo," a ti. Osaka hian grass leh clay court-ah hlawhtlinna a la chang ngai lo a, heng hmunah hian media hmachhawn pawh a hreh a ni.