NBA Playoff : Atlanta Hawks-in hma an hruai
Rinkai lo zawk ni mah se Atlanta Hawks an tlawm duh bik lo a, tunah chuan Eastern Conference semifinal series-ah 3-2 in hma an hruai ta, vawi khat an chak leh thei a nih chuan conference final an lut ang.
Nimin zing game 5 inkhelah Hawks hian Trae Young-a point 39 hmangin Philadelphia 76ers chu 109-106 in an hneh. June 19, Inrinni zing dar 5:00 hian State Farm Arena-ah game 6 an khel chhunzawm leh dawn a ni.
Seeded pakhatna 76ers hi rinkai zawk an ni a, nimin zingah pawh bul an ṭan fuh zawk. Quarter hmasa pathum an khelh zawh thlengin an chungnung zawk a, quarter hnuhnung berah Hawks hian Young-a free throw hmangin a vawi khat nan hma an hruai ve hram.
Thih thaa bei Atalanta hian quarter lina bikah point 40 zet an neih laiin 76ers erawhin point 19 bak an nei thei lo. Point 37 neitu Joel Embiid-a'n hun tawp dawnah free throw vawi hnih ngawt a hlah a, an tho chhuak thei ta lo.
Hawks chak puitu Young chuan, "Player zawng zawng kan in man tlang em em a, kan inhmangaihin kan induhsak tawn vek bawk. Mimal maia chak theih a nih lohzia kan hria a, kan zavai khan theihtawp kan chhuah takmeuh meuh a ni," tiin a sawi.
Nimin zing Western Conference semi-final lam inkhelah Los Angeles Clippers chuan an khingpui Utah Jazz chu 119-111 in an hneh ve bawk. Clippers hian beset of seven series-ah 3-2 in hma an hruai nghal.
Seeded pakhatna Jazz hian game hmasa pahnih an lak avangin harsa lo takin conference final an lut dawn niin a lang hman, tunah erawh match hnuhnung pathumah an chak lo vek - an zinkawng tawp thut thei a ni ta.
Clippers lamin an thiampuipa Kawhi Leonard chu hliam vangin chhawr thei lo mah se, point 37 neitu Paul George an neih avangin an buai phah lo. George hian rebound vawi 16 a la bawk a, playoff china rebound a lak hnem ber ṭumah a team a chakpui.
LA Clippers coach Tyronn Lue chuan, "Player zawng zawng an khel ṭha vek. A bik takin mawhphurhna la ngamtu Paul George khan fak a phu, ani khan kan mamawh hunah tak basket a rawn nei thei zel a, point a nei mai ni loin midang tan inrintawkna a siamsak," tiin a sawi.
