Croatia tan chak a ngai
Zanin dar 9:30 hian Croatia chuan Euro 2020 khelh laia an group match pahnihna atan Czech Republic an hmachhawn dawn a, 2018 World Cup finalist hian point an la hmuh loh avangin an tan chak ngei a pawimawh tawh dawn.
Croatia hian an match hmasa zawkah England an ngam lo. Czech Republic erawhin Scotland an hneh avangin point thum an hmu tawh thung, Jaroslav Silhavy enkawl Czech hian point an hmuh belh a nih chuan last 16 lut turin an dinhmun a ṭha tawh ang.
A fair lo!
Wembley Stadium-a mipui 20,000 chuang pungkhawm hmaah Croatia an chak lo a, Three Lions hian an khelmualah fans awm chungin group match pathum an khel dawn - an chak loh hnuah Luka Modric chuan mualneitu lamin fans an nei bik chu a 'fair' tawk lo nia a hriat thu a sawi.
Modric chuan, "Mi zawng zawngin mahni khelmuala fans nei chunga inkhelh ṭhat bikzia chu an hria ang. Croatia ngei pawhin min thlawptute hmaa inkhelh chu nuam kan ti ṭhin," tiin England laka an hun tawn chungchang a sawi chhuak.
Zaninah erawh Wembley Stadium ni loin Hampden Park Stadium, Scotland-ah an inkhel dawn. An khingpui Czech tan pawh khualmual ve tho a nih dawn avangin chhuanlam siam a rem tawh dawn lo.
Harh ngai Croatia
Kum thum liam ta khan Croatia hian Russia ramah World Cup final an khel a, khawvel mipuiin hahip in an fak. A hnu lamah erawh result ṭha an nei chhunzawm hlei thei lo, inelna hrang hranga match an khelh hnuhnung 10-ah vawi hnih chiah an chak.
Chutih rualin Zlatko Dalic-a naute hian kum 25 chhung chu major tournament an khelhin, group match hmasa pahniha tlawm ve ve an nei ngai lo. Zanina an khinhpui tur hi FIFA ranking lamah anmahni aia 26 ngawta hniam zawk an nih avangin an hlau lo ang.
Dalic chuan, "Kan match hmasaah khan tlarhma lam kan hriam tawk lo. Tunah chuan chak ngei ngei kan ngai tawh, chuvangin hmatawng lam kan thuam chak a ngai," a ti a, inkhel bul ṭantu player a siksawi ngei tur thu a sawi bawk.
Schick awmna
Scotland laka goal hnih a khung avangin Patrik Schick chu player ngaihven hlawh a ni a, goal mawi leh ropui a khung avangin an chinchin chu media lam chawtui a ni chhunzawm, zaniah pawh a lakah mipui mit a fu ang.
Czech coach Jaroslav Silhavy chuan, "A thil tihte avangin Patrik Schick hming an lamri hi a mak lo, a phu reng a ni. Amaherawhchu Scotland nena kan inkhelh ṭuma keeper David Marshall chet dan pawh kha sawi hmaih a thiang lo," a ti.
Silhavy hian point hmu tur chuan goal khung ringawt a tawk lo tih a hre chiang a, zaninah hian Croatia lakah point khat hmuh tuma tlarhnung lam an rem uluk zual a nih pawhin a mak hran lo ang.