Russia beiseina siamtu Miranchuk

Euro 2020 last 16 luh beiseina chhi nung turin Russia chuan Nilaini zan khan Finland chu 1-0 in an hneh a, goal awmchhun hi Aleksei Miranchuk-a khung a ni.

Russia leh Finland hian point thum ve ve an hmu a, nizan khan group B-a team dang pahnih Denmark leh Belgium an inkhel a, result kan hre hman lo.

Point 3 a hlu
Finland-in match hmasa berah mak takin Denmark 1-0 in an hneh a, goal awmchhun hi Joel Pohjanpalo-a'n a khung. Russia nen pawh bul an ṭan ṭha a, minute lina lekah Pohjanpalo hmang bawkin hma an hruai.

Amaherawhchu VAR hmanga an ennawn hnuah Finland striker hi a offside a, pawm a ni lo. Saint Petersburg-ah entu mipui an ṭhahnem a, mual neitu Russa-in inkhel an thunun zui.

Russia tan Magomed Ozdoev-a'n chance ṭha a hlah a, inkhel thunun mah se goal chance a ngah bik lo. First half injury time-ah Miranchuk leh Artem Dzyuba ten one-two hmanga Finland tlarhnung an ṭhiah hnuah Atalanta forward Miranchuk-a'n goal mawi bik a khung.

Second half-ah Finland chhuanvawr Teemu Pukki-a'n hun ṭha vawi hnih a hlah a, chutihrualin Russia-in chance ṭha an ngah zawk. Russia substitute Rifat Zhemaletdinov-a'n a hun ṭha neih goal zawnah a pet thei lo a, Iceland keeper Lukas Hradecky-a'n Daler Kuzyaev goal khung tur a dang bawk.

Eng nge an sawi?
Russia coach Stanislav Cherchesov chuan, "Team tak tak angin kan khel chhuak. Ka player-ten an tih tur angte an ti a, point thum hlu tak an hlawh chhuak. Formation ka thlang dik a, an tlarhnung ṭhiat turin mual sir kan hmang ṭangkai. Kan tumah kan hlawhtling a ni," tiin a sawi.

Finland coach Markku Kanerva chuan, "Goal kan venghim ṭha a, kan nawr tel bawk. Denmark ai khan kan khel ṭha zawk a, amaherawhchu goal kan khung thei lo. Goal hian team a ti phur a, chakna a pe ṭhin. Chutihrualin goal khung pawm loh a nih khan min ti hnual thung," tiin an goal khung pawm loh chuan inkhel result a tidanglama a ngaih thu a sawi.

Player inlante
Finland: Hradecky; Toivio (Jensen 85), Arajuuri, D O'Shaughnessy; Schüller (Kauko 67), Kamara; Raitala (Soiri 75), Lod, Uronen; Pukki (Lappalainen 75), Pohjanpalo
Russia: Safonov; Mário Fernandes (Karavaev 26), Diveev, Dzhikiya, Kuzyaev; Zobnin, Barinov, Ozdoev (Zhemaletdinov 61); Aleksei Miranchuk (Mukhin 85), Dzyuba (Sobolev 85), Golovin