Wimbledon khel lo tur Nadal

Rafael Nadal chuan Wimbledon a khel dawn lo tih a sawi chiang a, nipui laia khelh tur Tokyo Olympic-ah pawh a hmel a inlan loh tur thu a puang bawk.

Grand Slam vawi 20 champion tawh Nadal hian 2008 leh 2010 khan Wimbledon title hi a lo la tawh, kuminah hian inlan ngei tum mah se beisei anga clay court season a hman ṭhat lohna chuan na takin a nghawng niin a lang.

Kum 35 mi Nadal chuan, "Thutlukna siam harsa tak chu a ni a, amaherawhchu ka team te nen ka taksa dinhmun ngaihtuah chungin hetianga kan tih hi a ngai ta si. A pawimawh ber chu rei tak chhung tennis ka khelh theih dan tur ngaihtuah a ni," a ti.

Grass court inelna lianah hian Novak Djokovic-a'n a title kawl lai a humhim a nih chuan, major title lak hnem lamah Roger Federer leh Nadal (20 titles) te a nihrual dawn, player ropui pathum inelna hi a la tawp mai dawn lo.

Spanish tlangval Nadal chuan, "A nihna takah chuan Roland Garros leh Wimbledon inkarah chawlhkar hnih chiah hun a awm a, clay court season hman hnua grass lama insawm chhunzawm leh turin hun a tam tawk lo a ni," a ti.

Wimbledon bakah Olympic a khel thei dawn lo a, mahse Beijing Olympic-ah khan singles huangah gold medal a la tawh a, Rio Olympic-ah khan doubles huangah gold medal a lo la tawh bawk - infiamna khawmpui lian hi kum li dana neih a nih avangin a hun a tawp a ngaih a ni nghal.