Zanin dar 9:30-ah Portugal vs Germany

Zanin hi Euro 2020-a 'Group of Death' tiha sawi group F inlan hun a ni a, en a châkawm leh tawh hle. Hungary leh France te zanin dar 6:30 hian Budapest-ah an inhmachhawn ang a, zanin dar 9:30-ah Portugal leh Germany te Allianz Arena-ah an inkhel lehnghal dawn.

Inelna thlengtu leh Euro C'ship-a record nei ṭha ber Germany-in point an la hmu lo a, Joachim Low hote tan last 16 lut turin point hmuh ngei an mamawh. European champion Portugal erawhin Hungary an sawp avangin tun dihmunah an thla a muang a, captain Cristiano Ronaldo-a'n Euro 2020 chhung ngeiin rama tana goal khung tam lamah Iran legend Ali Daei record khum a tum ang.

Low-a naute
Germany-in France an hmachhawn ṭumin an goal bawh a na tawk lo a, keeper Hugo Lloris tan hna an siam thei miah lo. Die Mannschaft hian tlarhmaa dah tur 'out and out striker' an kawl lo a, Les Bleus nena an risk Serge Gnabry a che ṭha lo.

Joachim Low-a'n tlarhma a siksawi hret a nih chuan Champions League-a Chelsea champion puitu Timo Werner pawh bul ṭan theih dan a awm. Midfield laia Toni Kroos leh Ilkay Gundogan te duhthusam lohna lai awm mah se helai hmuna khel thei tur Leon Goretzka a la inpeih loh avangin a ngai bawka an luh a rinawm zawk.

Germany defender Matthias Ginter chuan, "A êng zawngin kan thlir a, team boruak a ṭha a, Portugal nen pawh chak tumin kan khel ang. Set piece-ah training kan nei nasa a, France nen khan a tawp kan khar ṭhin lo. A hmawr kan bawk ṭhat a ṭul tawh dawn a ni," tiin team boruak a ṭhat thu a sawi.

Les Bleus nen khan Germany-in freekick aṭanga an chance ṭha neih an hmang ṭangkai lo a, Thomas Muller telna tlarhmaa hoten an hmawr an bawk fuh thei lo. France ai chuan Portugal tlarhnung a pan hret a, Die Mannschaft goal bawh na sawt tura ngaih a ni.

Portugal ve thung
Portugal-in an match hmasa berah Hungary 3-0 in an sawp a, amaherawhchu goal hmasa ber minute 84-naah an khung chauh. Coach Fernando Santos a fimkhur a, midfield laiah defence pui turin player chak pahnih William Carvalho leh Danilo te a hmang.

Germany nen pawh Portugal team hi an fimkhur leh a rinawm a, chutihrualin Cristiano Ronaldo telna a nih miau avangin Joachim Low hote pawh an inven uluk ve tho a ṭul. Selecao hote hian Ronaldo bakah tlarhmaah Diogo Jota, Bruno Fernandes leh Bernardo Silva te an kawl a, an goal bawh a na dawn.

Amaherawhchu Ronaldo ṭuan a fum ve ṭan a, French forward Kylian Mbappe tluka tlan chak leh rintlak an kawl loh avangin German defender te tan hna a hahdam deuh turah a ngaih theih. Chutihrualin Portugal leh France goal nawr dan hmang a inang lo - Selecao tlarhmaa awmte hi an club khelhnaa goal khung thei bik vek an ni.

Hriat tel tura ṭha erawh Portugal-in Hungary an hneh theih nana player ṭangkai ta ber erawh bench aṭanga lut Rafa Silva a ni. Benfica midfielder Rafa Silva hi a teammate-te angin lar hluai lo mah se Hungary nena goal thum a an khung ṭumah a inrawlh vek. Zaninah pawh hian player langsar karah langsar lo zawk an che ṭha thei tlat.

Group A - Inlan tura beiseite

Portugal Vs Germany
Portugal: Rui Patrício; Nélson Semedo, Ruben Dias, Pepe, Guerreiro; Danilo, William Carvalho; Diogo Jota, Bruno Fernandes, Bernardo Silva; Ronaldo
Germany: Neuer; Ginter, Hummels, Rudiger; Kimmich, Gündoğan, Kroos, Gosens; Havertz, Muller; Gnabry

Hungary Vs France
Hungary: Gulacsi; Botka, Orbán, At. Szalai; Nagy; Lovrencsics, Kleinheisler, Schafer, Fiola; Ad. Szalai, Sallai
France: Lloris; Pavard, Varane, Kimpembe, Hernández; Pogba, Kanté, Rabiot, Griezmann; Benzema, Mbappe

Chakin bul kan ṭan a, mahse point thum chauh kan la hmu. Match hnih pawimawh takin min hmuak a, result ṭha neih chhunzawm a pawimawh ang. - Fernando Santos, Portugal coach

Kan thil tum leh rilru put hmang a la ngai reng. Chuvang tak chuan thil awm dan hi kan thlak danglam theih kan la ring. Tlarhmaa lama kan insiamṭhat hret theih chuan Portugal kan thei ang. - Joachim Low, Germany coach