De Bruyne-a’n Belgium a chakpui
Ningani zan khan Belgium-in Denmark 2-1 in an hneh a, Euro 2020 last 16 an lut. Parken Stadium-ah Yussuf Poulsen hmangin Denmark-in minute khat leh second 39 lekah hma hruai mah se second half-ah Kevin de Bruyne a rawn lut a, inkhel kalhmang a danglam vek.
Belgium-in minute 54-naah Thorgan Hazard hmangin siphurh an sut a, Manchester City midfielder De Bruyne hian minute 70-naah chakna goal a khung.
A goal hma
Denmark-in damlohna vangin Christian Eriksen an chhawr thei lo a, Inter Milan midfielder hi Finland nen an inkhelh ṭumin khelmualah a tlu.
Eriksen-a'n entu mipui leh team chhungah nghawng a la nei lian a, Euro 2020 inkhel satliah a ni lo - inkhel boruak a danglam bik. Parken Stadium-a entu mipuiin kawr sen an ha ṭhup a, inkhel a hmuhnawm phah hle.
Denmark-in nung takin inkhel bul an ṭan a, ṭan chiahah Pierre-Emile Hojbjerg ball pek chu Yussuf Poulsen-a'n minute khat leh second 39 lekah ṭha zetin a pet goal. Euro inelnaa goal rang ber dawttu a ni a, Euro 2004-a Russia player Dmitri Kirichenko-a'n Greece lama second 67-na leka a khung chauh a pha lo.
Belgium an che thei lo a, Denmark goal bawh a na hle. Poulsen bakah Barcelona forward Martin Braithwaite leh Sampdoria forward Mikkel Damsgaard te hmangin vawi tam Belgium tlarhnung an rum ṭhaih a, an vanneih tawk loh avangin goal hnihna an khung lo.
Danglamna thlentu KDB
Belgium manager Roberto Martinez-a'n second half ṭantirhah Kevin de Bruyne a luhtir a, Man City midfielder hian inkhel a thlak danglam chiang hle.
De Bruyne awm hnuah Belgium inkhel a danglam a, first half-a striker naran Romelu Lukaku pawh player ṭha bik a nih phah. Minute 54-naah Lukaku-a'n Denmark defender Jannik Vestergaard leh Simon Kjaer te dan hman loin chak takin ball a khalh a, De Bruyne tan ball ṭha a pe.
Man City midfielder De Bruyne hian goal-a pet mai loin fing takin hun thawl a insiam a, goal-a pet loin Thorgan Hazard tan a siamsak. Borussia Dortmund player Hazard-a'n awlsam takin a pet goal.
Minute 70-naah Lukaku-a'n mual sirah Denmark defender-te a inumtir a, Youri Tielemans ball pein Leicester City midfielder hian Thorgan Hazard a pe a, Dortmund midfielder hian a u Eden Hazard pe lehin Real Madrid midfielder hian De Bruyne tan a pe leh a, Man City midfielder hian ṭha zetin a pet goal.
Belgium goal hnih khung a class ve a, ha hipa De Bruyne fak mai loh chu tih theih dang a awm lo. Denmark-in point hmuh tumin Belgium an nawr let a, Braithwaite-a'n crossbar hial tauh per mah se goal hmuh tur a awm zui tawh lo.
Eng nge an sawi?
Belgium coach Roberto Martinez chuan, "Team ṭha kan tum lohna a rei ta deuh a, first half-ah khan ka player-te khan mak a ti. Chutihrualin inkhel thlak danglam thei turin tawnhriat kan nei ṭha a ni," tiin a sawi.
Denmark coach Kasper Hjulmand chuan, "Mipui thlawpna kan hmu ṭha a, kan lawm hle. Beisei tur a la awm a, tunah chuan Russia nena kan inkhel tur chauh ka thlir tawh," tiin beisei an la neih thu a sawi. Denmark hian point la hmu lo mah se match hnuhnung bera Russia an hneh chuan last 16 an lut thei ang.
Minute 10-na Eriksen-a tan: Belgium leh Denmark inkhelh laiin minute 10-naah Christian Eriksen pualin inkhel tihtawp lailawk a ni a; entu mipui, player, referee leh coaching staff ten damdawi ina inenkawl mek Danish midfielder Eriksen-a pualin hun an hmang.