France an kal zel dawn em?

Euro 2020-a champion tura rinkai France-in Germany an luhchhuah a, zanin dar 6:30 hian Hungary hmachhawn turin Ferenc Puskas Stadium, Budapest an tlawh leh dawn.

Hungary hi an muala inkhel tur an ni satliah lo a, stadium khat entu punkhawm an phal miau avangin 'home match' tak tak a ni dawn. An match hmasa berah pawh hun rei tak Portugal an chelh thei a, France lakah pawh result ṭha neih an tum dawn.

Coach Marco Rossi chuan, "Minute 84 chhung game plan angin kan khel a, a tawk lo. Minute 90 chhung kan khelh a ṭul tawh ang," tiin a sawi a, France lakah pawh goal chhuah loh an tumleh dawn.

Hungary midfielder Loic Nego hi France rama piang a ni a, Les Bleus tan kum bithliah inelnaah a khel char charin kum 2010-a Euro U19 an champion ṭumin Antoine Griezmann te nen an khel ho. Nego hian beisei a pha ta lo a, France senior team-ah tel loin Hungary tan a khel ta zawk.

Hei hian France leh Hungary inkar hlat zia a pholang. Hei chauh hi a ni lo, tun ṭuma France team hi Euro 2000-a an champion ṭum ang tho khan ṭha. Tlarhmaah Kylian Mbappe, Griezmann leh Karim Benzema te an inkawp thei a, a nihna takah chuan France team hian Hungary tum tawk tur hi chu tuna an koh loh aṭang hian team thar an la din thei ang.

Amaherawhchu football-ah chuan engpawh thleng thei a ni a, France team ṭha tak pawh hian Germany hneh mah se an player zingah goal khung an la awm lo. An khelhna hmun tur hi Budapest a nih bawk avangin eng result pawh thleng thei a ni.