Morata leh Lewy ten goal an khung tawh dawn em?
Zanin dar 12:30-ah Spain leh Poland te an inkhel dawn. Euro 2020 group E-a team ṭha pahniha ngaihte hi an match hmasa bera an result avangin an dinhmun a ṭha lo a, Estadio de La Cartuja-a an inkhel tur hi a hmuhnawm phah sawt ang.
La Roja hian an hmasa berah Sweden an hmachhawn a, 86% ball an chang chungin goal an khung lo a, point khat chauh an hlawh chhuak.
Poland-in an match hmasa bera Slovakia an hmachhawn ṭumin Robert Lewandowski-a'n beisei a phak lo a, midfielder pawimawh Grzegorz Krychowiak hnawhchhuah a nih bawk avangin an chak lo.
Home Advantage?
Luis Enrique-a'n huaisen takin player 26 thlan theih turah player 24 a ko a, Real Madrid player a thlan loh avangin 'pressure' an nei nghal.
La Roja hian Seville-ah inelna hi thleng mah se home advantage an nei ṭha tawk lo. Pakhatna chu khelmual ṭhat tawk loh vang a ni a, pahnihna chu Spain ṭantute ngeiin goal khung theih loh vangin Alvaro Morata an au el.
Sevilla khelmual hi a ro deuh a, ball inpe kual tam Enrique hote tan a ṭha lo. Sweden nena an inkhelh ṭum pawhin khelmual vang hian harsatna an nei phah a, chutihrualin tunkar chhoah boruak a daih a rinawm a, hei hian khelmualah pawh nghawng a neih a beiseiawm.
Goal khungtu striker
Alvaro Morata-a'n Spain ṭantute lawmna a siam zo lo a, amaherawhchu Luis Enrique-a'n a ring tlat. Poland nen an inkhelh hunah pawh Morata hi a luh ngei a rinawm a, chutihrualin Ferran Torres aiah Europa League-a Villarreal champion puitu Gerard Moreno a inlan a rinawm tawh thung.
Spain captain Sergio Busquet chu Covid-19 positive vanga a awl hnuin a negative leh tawh a, team a zawm leh tawh. Barcelona midfielder hi tlarhnung puitu tiha sawi theih ni mah se Poland lakah a inlan a nih chuan goal nawr kawngah pawh a ṭangkai tho ang.
La Roja ang thoin Poland-in goal khungtu an mamawh a, Robert Lewandowksi-a'n thlawptu a neih ṭhat loh avangin Slovakia hmaah beisei a pha lo hle. Bayern Munich striker Lewy hian Ballon d'Or dawn a duh a nih chuan goal khung a mamawh.
Euro 2012 leh Euro 2016-ah Lewy hian goal khat ve ve chauh a khung a, World Cup 2018-ah goal a khung lo. Club level-ah Lewandowski hi striker ṭha ber tiha sawi theih ni mah se ram tan inelna liana a chet ṭhat loh chuan a hming ṭhatna tam tak a hliau thei ang.
Inlan tura beiseite
Spain: Simón; Azpilicueta, Laporte, Pau Torres, Alba: Llorente, Busquets/Rodri, Pedri; Gerard Moreno, Morata, Olmo
Poland: Szczęsny; Bereszyński, Glik, Bednarek; Jóźwiak, Moder, Linetty, Rybus; Klich, Zielinski; Lewandowski