Netherlands-in last 16 an lut
Euro ṭan a nih hmain rin hlawh tawk lo mah se Netherlands-in result hmangin anmahni ringhleltute an chhanglet a, Ningani zan khan 2-0 a Austria hnehin Euro last 16 an lut - kum 2008 hnua European championship-a knockout round an luh hmasak ber a ni.
Netherlands tan Memphis Depay (penalty) leh wing back Denzel Dumfries-ten goal khat ve ve an khung a, Austria lamin a chhanletna tur an neih loh avangin Dutch team an chak.
Frank de Boer enkawl Netherlands hian an match hmasa zawkah Ukraine chu 3-2 in an lo hneh tawh a, Austria an hneh leh tak avangin June 21 zana North Macedonia an inhnehtawkpui chuan group hmahruaitu ni chungin knockout round an lut ang.
Group C-ah hian match hnih khelh tawha chak ve ve Netherlands chuan point ruk neiin hma an hruai mek a, an hnuaiah Ukraine (3 points), Austria (3) leh North Macedonia-te an awm.
Team thar
Football khawvela ram ropui sawi a nih apianga sawi hmaih ni ngai lo Netherlands-in Euro 2016 an khel phak lo a, World Cup 2018-ah an tling zo lo zui - an tan chuan mualphona tawpkhawk a ni.
He Dutch team hian indinthar tumin Ronald Koeman hnuaiah hma an la thar a, hma pawh an sawn - match 20 a kaihhruaiah vawi 11 an chak a, vawi nga an khingpui inhnehtawkpuiin vawi li chiah an tlawm.
Mahse, Barcelona an lo lang a, Koeman-a'n player a nih laia hming a lo chher tawhna club hi a hnar thei ngang lo - Netherlands a hawisan a, Catalan club lam panin a puanthuah a tel.
Netherlands-in harh tharna thlen turin player an nei ṭha tawk. Mahse, coach lam chu buaina a ni ta a, Netherlands fan-ten an team 'thar' chuan eng kawng nge an zawh dawn an thlir lawk thiam lo.
Rin loh lam
Netherlands-in September 2020-ah coach thar an nei a, an coach erawh Inter Milan leh Crystal Palace-a hlawhchham Frank de Boer a ni a, player a nihna angin hlawhtling viau mah se Dutch 'golden generation' kaihruai tur chuan rin a harsa takzet.
Oranje hian captain Virgil van Dijk, Juventus defender Matthijs de Ligt, Inter Milan centre back Stefan de Vrij, Liverpool midfielder Georginio Wijnaldum, Barcelona midfielder Frenkie de Jong, Lyon forward Memphis Depay leh Wolfsburg striker Wout Weghorst te an nei a, mahse, coach zawk hi a manganthlak!
De Boer hnuaia an match hmasa berah October, 2020 khan Mexico an hmachhawn a, 1-0 in an tlawm. Bosnia and Herzegovina (0-0), Italy (1-1) leh Spain (1-1) an inhnehtawkpui zui a, De Boer chu Netherlands coach zinga a match hmasa palia chak zo lo hmasa ber a ni.
Mahse, Dutch coach hi a insiamṭha - Spain an inhnehtawkpui hnuah Euro hma khan match sarih an khel a, vawi khat chiah an tlawm a, vawi khat draw result neiin vawi nga an chak.
Rin loh laklawh!
Netherlands mipuiten De Boer an ring lo laklawh a, Euro an khelh turah pawh beiseina an nei sang lo - an thiampuipa leh hruaitu, Virgil van Dijk chuan hliam vangin Euro a khelh theih loh tur thu a puang zui.
Liverpool defender hian season thar atan fit ṭha taka inelna hmachhawn a duh vang a ni a, chutihrual chuan an ram team hi champion tur khawpin ring ta se Euro hi a hnar phal kher lo ang.
Chutiang taka rin hlawh lo chungin Netherlands-in Euro an hmachhawn a, an match hmasa berah hmuhnawm takin Ukraine chu 3-2 in an hneh - an tlarhnung sawisel an la ni cheu a, an phu angin fak an ni lo.
Ningani zanah erawh Netherlands sawiselna tur a awm ta lo - an dan pangngai angin goal khung an thiam a, tlarhnung lamin goal an chhuah lo a, 2-0 in team ṭha pangngai Austria an hneh.
De Boer & 3-5-2
Dutch coach De Boer-a formation duh ber chu 3-5-2 a ni a, hei hi Dutch mipui tam takin an ngaina lo - Ukraine nena an inkhelh hma phei kha chuan fans ṭhenkhatin thlawhnaa '4-3-3' hmang mai rawh' tih inziak chuanna banner tar chungin an tih el a, an training-na chungah an thlawk kual!
Mahse, De Boer a nghing lo. Ukraine lakah 3-5-2 hmang lui ngatin a hlawhtlinpui a, Austria lakah pawh he formation tho hi a rawn hmang a, tun Euro-a player hmuhnawm ber pawl Denzel Dumfries chu he formation chhawrtu langsar a ni.
PSV Eindhoven defender hian forward ang deuhthawin a hna a thawk thei a, minute 11-naah penalty a hlawh chhuak zui - Austria captain David Alaba chu Dumfries lakah a foul a, penalty a chawi.
Video assistant referee hmanga ennawn a nih hnuah referee-in penalty spot a kawk a, Depay chuan harsatna awm loin goal-ah a chantir - ram tan match 66 a khelha goal 27 a khungna chiah a ni a, heng zinga goal riat hi De Boer hnuaia a khung a ni a, ram tana a match hnuhnung 22-ah goal 27-ah a inrawlh tawh.
A la tawk lo
Depay-a'n an goal hnihna khung theihna remchang nei mah se a chance neih a chhawr lo a, minute 67-naah an goal hnihna luh theih nan tha a thawh thung - bench aṭanga luhtir Donyell Malen tan ball a siamsak a, Malen hian free takin a tlan luhpui.
PSV forward hian a duh chuan hmasial takin pet thei mah se Dutch club tana a khelhpui Dumfries-a duhsakna a lantir a, Euro duhawm tak hmangtu wing back hian harsatna nei loin goal-ah a chantir.
Ukraine laka tlarhnung nghing ve deuh nia lang Netherlands-in a hliam dam hnuah Matthijs de Ligt an chhawr thei leh tawh a, Juventus defender a awm hnuah Netherlands tlarhnung a phui sawt.
Austria-in Netherlands tlarhnung nghet an su hawng hlei thei lo a, hun tawp hnaih tawh lama an thiampuipa Alaba chance neih tih loh chu ui taka han sawi tur an nei meuh lo.