Ukraine-in beiseina an chhi nung

Netherlands laka an tlawm hnuin Ukraine an tlawm nawn duh tawh bik lo a, North Macedonia chu 2-1 a hnehin last 16 luh beiseina an la nei ve zel.

Ukraine tan Andriy Yarmolenko chuan minute 29-na lekah goal hmahruai a khung a, minute nga liam hnuah Roman Yaremchuk chuan mawi zetin an goal hnihna a khung zui.

North Macedonia-in minute 57-naah Ezgjan Alioski hmangin an si phurh an sut a, Leeds United winger penalty pet hi Ukraine keeper Heorhiy Bushchan chuan dang zet mah se a per lehlam chu Alioski hian goal-ah a chantir.

Macedonia penalty hi striker chhuanvawr Goran Pandev-a hlawhchhuah a ni a, Inter Milan striker hlui hi first half-a a goal khung chu offside vanga pawmsak a ni lo bawk - Arijan Ademi goal khung lohte kha an thlirkir ang a, an ui vawng vawng ang.

Chutihrual chuan striker ropui ṭhin Andriy Shevchenko enkawlna hnuaia khel Ukraine hi an vanneih zan ni se goal tam zawka chak thei tur an ni. Macedonia keeper Dimitrievski chuan Ruslan Malinovskiy shot chu ṭha zetin a dang a, Yaremchuk goal khung tur nia langa Stefan Ristovski lo inrawlh hmante chu a ṭha hle.

Viktor Tsyhankov chuan Ukraine tan chance duhawm a hlah bawk a, an penalty hlawhchhuah pawh goal-ah an chantir thei lo - Macedonia midfielder Daniel Avramovski handball vanga an penalty hmuh chu Ruslan Malinovskiy chuan goal-ah a chantir thei lo a ni.

Ukraine-in hnehna an chan avangin knocout round an la mitthla ngam a, an hneh tak North Macedonia erawh Netherlands-in Austria an hneh bawk avangin Euro 2020 aṭanga tla hmasa ber an ni a, group mawngphahah inelna hi an khar dawn tih a chiang tawh.