Wales-in Italy an hlau bik lo
Pathianni zan dar 9:30-ah group A hmahruaitu zawnna inkhel neih a ni dawn a, Italy leh Wales-ten Rome khawpuiah chungnung zawk nih an inchuh dawn.
Squad en mai aṭang chuan Italy chu team ṭha zawk an ni a, group stage-a match hnih an khelh tawh aṭanga chhut pawhin Italy an chungnung zawk.
Mahse, Wales forward Daniel James chuan, "Chak lo tur anga dah sa theih kan ni bik lo. Italy hi team ṭha tak chu an ni ngei a, mahse, kan chak thei tih hre chungin kan inkhel dawn," a ti a, a zam lo.
Group A inkhel dangah Switzerland chuan Pathianni zan dar 9:30-ah vek Turkey an hmachhawn dawn a, team pahnih tan inkhel tur hi thih leh dam kar hriltu pakhat a ni dawn.
Duhthlanna
Group A-a pakhatna hian last 16-ah group C-a pahnihna an hmachhawn dawn a, Netherlands chu group hmahruaitu an nih chian tawh avangin Ukraine emaw Austria an hmachhawn thei dawn tihna a ni.
Hetihrual hian group A-a pahnihna hian group B-a pahnihna an tum dawn a, group B-ah hian Belgium chu last 16 lut tawh an ni a, Finland an la tum dawn avangin hmahruaitu erawh an la ni chiang lo.
Group B-ah hian Belgium bakah Russia, Finland leh Denmark-te chu last 16 la lut thei vek an ni a, group A pahnihna hian Russia, Finland leh Denmark zinga a tu emaw ber hi an hmachhawn a rinawm.
Finland-in an la hmachhawn tur hi Belgium a nih avangin an tlawm a rinawm zawk a, chuti a nih chuan Russia emaw Denmark hi last 16-ah group A-a pahnihna tan chuan hmachhawn an ngai dawn tihna a ni - group hmahruaitu niha Ukraine emaw Austria hmachhawn a châkawm zawk a, Italy leh Wales-ten chak zawk nih an tum ngei ang.
Italy an ṭha
Euro ṭan hma aṭang tawhin Italy ṭhat thu sawi chamchi a ni a, Euro khelh a nih hnuah a takin an lantir - Azzurri hian an match hmasa pahnihah team pangngai tak Turkey leh Switzerland chu 3-0 ve vein an hneh a, goal an khung thiam piah lamah an veng thiam tih a lang tel.
Roberto Mancini-a'n 4-3-3 formation hmangin inkhel hmuhnawm a pho chhuak ṭhin a, Ciro Immobile, Lorenzo Insigne, Domenico Berardi, Manuel Locatelli leh Giorgio Chiellini te ho khel ho chu mit ti tlai a tling ṭhin.
Mahse, Wales lakah erawh Italy hian an squad an siksawi dawn nia sawi a ni a, hei ringawt pawh Wales tan tawh khirh tak erawh an la ni dawn tho - Switzerland laka inlan lo player-te chu Italy hian friendly match an buatsaih sak a, 9-1 ngawtin club tenau Cremonese Primavera chu an sawp.
He inkhelah hian Italy tan Andrea Belotti leh Federico Chiesa-ten hattrick an siam ve ve a, player pahnih hi tlarhmaa Mancini hman thiam sa pathum thlak turin Bernardeschi nen an luh a rinawm.
Verratti a dam
Hliam nei chunga hruai Marco Verratti-a'n Cremonese nena friendly match an khelhah bul a ṭan a, Wales an hmachhawn hunah Italian midfielder thiam bik hian bul a ṭan ngei a rinawm.
Chuti a nih chuan Verratti awm loh hlana khel ṭha tak Manuel Locatelli-a'n hahdamna hun a nei thei dawn tihna a ni a, player pahnih hian Mancini thluak chu an tibuai khawp ang.
Switzerland lakah captain Giorgio Chiellini a inhliam a, Lazio centre back Francesco Acerbi-a'n Juventus defender hmun ruak hi a luah thei tura ngaih a ni.
A tawi zawnga sawi chuan, Italy tan last 16 a chiang tawh a, inelnaa sang zawk thlen duh chuan Mancini tan tun hi player ṭhenkhat chawlh hahdamtirna hun a ni a, Azzurri hi an ṭhat dan bera an rawn inlan lo a nih pawhin thil mak a ni lo ang.
Wales vanneihna
Rob Page-a kaihhruaina hnuaiah Wales an hmuhnawm a, an match hmasa bera Switzerland an hmachhawn ṭumin beisei phak lo mah se Turkey laka an khelh dan en chuan dah hniam an harsa.
Wales vanneihna langsar tak pakhat chu Gareth Bale-a'n ngai a awh leh ta hi a ni a, Turkey laka Bale-a inkhel en chuan a thiam a la theihnghilh lo tih chiang takin an hmu.
Juventus midfielder Aaron Ramsey leh Stoke City midfielder Joe Allen-te sawi hmaih an thiang lo a, Manchester United winger Daniel James hi Italy tan buaipui tham a ni leh bawk ang.
Page-a'n Euro-ah 4-1-4-1 formation a hmang chu mak tih hlawh a ni a, a hman fo ṭhin 4-3-3 chu Italy-ah hian en leh chhin tura ngaih a ni - chuti a nih chuan Kieffer Moore a chhuak ang a, 'false nine' angin Harry Wilson a lut ang.
Swiss team beiseina
Switzerland tan last 16 luh beiseina nei turin Turkey lakah chak ngei ngei a ngai tawh a, an chak a nih chuan point li an nei ang a, point li hmu hrim hrim tan chuan pathumna ti ṭha pali zinga tel chance a sang.
Euro 2020-ah hian group tina pakhatna leh pahnihna chu last 16 lut tur an ni a, group paruk aṭangin pathuma zinga a ti ṭha pali an tlang dawn bawk.
A tawi zawnga sawi chuan team 24 inel aṭangin team pariat chiahin knockout round an lut dawn lo a, heng zinga tel chu Switzerland leh Turkey tan chuan mualphona a ni ang.
Turkey-in chak ngei ngei an mamawh a, an chak a nih pawhin pathumna ti ṭha zinga tel chu an beisei theih san ber a ni - mualpho taka Euro mangṭha an duh dawn bik lo.