Wimbledon-ah Osaka kan hmu dawn lo

Rilru lam harsatna neih vangin Naomi Osaka chu Wimbledon-ah kan hmu thei dawn lo. Japanese nula hian nipui laia neih tur Tokyo Olympic-ah erawh inlan theih ngei a beisei thung.

Grand Slam vawi li champion tawh Osaka hian 'depression leh anxiety' a nei a, hei vang hian tournament laia tih ngei ngei ngai chanchinthar thehdarhtute hmachhawn pawh a hreh. French Open-ah khan press a hmachhawn loh vangin £10,570 an chawitir tawh.

Clay court inelna lian aṭang hian hnehna a chan hnu lawkah a inhnukdawk zui a, tunah chuan a chhungte leh ṭhiante bulah hun hman a duh. Harsatna a nei chung hian All England Club-ah hian inlan tura ngaih a ni; Nilaini mai pawh khan tournament buatsaihtu lam chuan a inlan an rin thu an la sawi.

Mahse, Osaka-i agent Stuart Duguid chuan Ningani zan khan, "Naomi hian kuminah Wimbledon a khel lo ang, tennis piah lama hun thawl hman a ni. Olympic-ah erawh an pianna rama amah ṭantute hmaa inkhelh ngei a tum," tiin a sawi.

Osaka hian major title pali a lak tawhte hi hard court-ah vek a ni, grass leh clay-ah a la hlawhtling ngai lo. French Open-a boruak a neih pawh kha mi tam tak chuan a chhuanlam niah an ngai hman a, rilru lam harsatna a nei tih an hriat hnuah erawh khawngaih a hlawh.

Wimbledon-ah hian 2017 leh 2018 khan third round a lut a, 2019 khan a match hmasa berah a chak lo; nikum erawh hri leng vangin an khel thei lo thung. Tun hnaiah a zawnin tournament pathum aṭangin a inhnukdawk.

Twitter lamah Wimbledon chuan Osaka chungchang sawiin, "Naomi Osaka awm lo tur hi channa lian tak a ni. In lamah hlim takin awm la, Olympic ṭha taka khel thei turin duhsakna kan hlan che, season tharah chuan kan inhmuh ngei kan beisei," an ti.

Wimbledon aṭang hian mipa player ṭha Rafael Nadal pawh a lo inhnukdawk tawh. Spanish star hian French Open leh Wimbledon chu atan a inhnaihchilh thu leh, chawlh hahdamna hun a mamawh thu a sawi bawk a ni.

Nadal awm lo mah se Roger Federer erawh a awm dawn. Wimbledon vawi sarih champion tawh hian grass court season hman ṭhat a duh vangin French Open aṭangin a inhnukdawk hial a, mipui ngaihven hlawh bik a ni leh ang.

Wimbledon hi nikum khan coronavirus vangin an khel thei lo, tun season atan chuan June 28 aṭanga July 11 chhungin All England Club-ah an khel dawn a ni.