Tottenham-in manager tur an la hmu lo

Jose Mourinho a chhuak a, a hmun ruak luah tur zawn hmuh leh chu thil harsa tak a ni. Tottenham Hotspur chuan nimin tlai thleng khan season thara an team enkawl tur an la zawng hmu thei lo.

April thla khan Mourinho an ban a, manager lailawk Ryan Mason kaihhruaina hnuaiah season an hmang tluan. Club lian 'inti' ve Spurs hian Premier League club ṭha dangte elphak tur manager an zawng a, an beisei angin thil a thleng thei rih lo a ni.

Spurs manager ni thei tura media lamin an sawi tharlam ber chu Gennaro Gattuso a ni. Mahse, North London club hian Italian manager hi an dawr ngam ta chiah lo niin a lang. Tunah chuan hmun dang an hawi leh rih a ngai dawn.

Fiorentina chhuahsan thuttu Gattuso hi Spurs director of football thar Fabio Paratici-a'n a mi duh tak nia sawi a ni; media lam pawhin an sawi zawm nghal. Mahse Ningani zan khan fans lamin #NoToGattuso tih hashtag hmangin Twitter lamah Gattuso an duh loh thu an tlangaupui.

Player a nih lai aṭanga rorum leh pa tak Gattuso hian tun hmain neih inang inkawp leh hmeichhe football a thlawp loh thu a lo au chhuahpui tawh a, he a ngaihdan hi Spurs ṭantuten an duh loh chhan langsar tak niin an sawi tel bawk.

Spurs hian an beisei angin manager an hmu mai thei lo. Julian Nagelsmann, Brendan Rodgers, Erik Ten Hag leh Antonio Conte te nen thawm nei mah se an hlawhtling lo vek; an manager hlui Mauricio Pochettino pawh an kokir thei lo.

August 14 aṭangin Premier League season thar an khel ṭan dawn, season hman ṭhat an duh a nih chuan manager zawn hmuh hma hi a pawimawh ang. Spurs hian an league match hmasa berah champion lai Manchester City an hmachhawn nghal dawn a ni.