Neymar awmna Brazil an thiam

Football leh Brazil a inzawm tlat a, a cheimawitu chu Neymar a ni. World champion vawi nga ni tawh hian nimin zing khan Peru 4-0 in an sawp a, Copa America 2021 khelh laia an match hmasa pahnihah an chak.

Tite naute tan hian Alex Sandro leh Neymar ten goal an khung a, hun tawp dawnah Everton Ribeiro leh Richarlison ten an khung belh bawk. Copa America hnuhnung bera finalist team pahnih inkhel hi an inthlau hle.

June 24, Ningani zingah Brazil hian an group match pathumna atan Colombia an hmachhawn leh ang a, chumi hnuah Ecuador nen an la inkhel leh ang. Group pakhata team panga inel zinga a sang paliin quarterfinal an lut dawn a ni.

Insiksawi
Brazil coach Tite-a'n player ṭha a ngah a, nakkum World Cup khel tura chher hriam vek a tum. Venezuela an sawp ṭuma player bul ṭantu paruk ngawt a siksawi a, tlarhma lama chhuanvawr Neymar erawhin bul a ṭan nawn.

Tlarhnung laiah a tir aṭangin Thiago Silva a rawn ding thei tawh a, Marquinhos chu bench lamah dah a ni. Liverpool goalkeeper Alisson chu hahchawlh tirin si ban nghak tur hian Manchester City goal vengtu Ederson a inlan thung.

Fabinho-a'n midfield lailum a luah a, a laiah hian Manchester United player Fred nen an inkawp; a sirah Man City hmatawng Gabriel Jesus leh Everton Soares te an awm thung. Roberto Firmino leh Richarlison te bench-ah an ṭhu.

Neymar-a show
Olympic Stadium-a inkhelah a tir aṭangin Brazil an chungnung a, forward Neymar-a'n a ball thiamna hmangin Peru tlarhnung a chhaih buai nghal, goal hmasa ber erawh Juventus defender Alex Sandro-a'n hnai tak aṭanga a khung a ni.

Tite nauten inkhel thunun viau mah se goal neih belh erawh an harsat. Second half minute 68-naah Fred hnen aṭanga a ball hmuh chu Neymar-a'n rang taka insiamrem puiin box pawn aṭangin keeper dan phak lohah a hlap lut.

Neymar-a'n freekick aṭangin goal hlauhawm a neih hnuah, bench aṭanga lut Richarlison leh Ribeiro ten an khung. An goal hnuhnung pahnih luh theih nana Neymar-a ball pass leh khen pial (flick) zauh mawizia chu sawi hmaih theih a ni lo.

Pele hnungah
Paris Saint-Germain forward Neymar-a'n ram tan match 107 a khelh aṭangin goal 68 a khung tling ta a, legend Pele (77 goals) a hnaih tawh hle; tun ang zela a khel tluang a nih chuan ram tana goal khung hnem lamah hian a khum ngei a rinawm.

Kum 29 mi Neymar chuan, "Mimal hmingṭhatna ai chuan Brazil tana ka khel thei hi kei leh ka chhungte tan chuan a hluin a ropui bawk. Brazil aiawha inkhelh phak hi ka duhthusam a ni ṭhin a, hetah hian ka lungawi tawk chu ka hmu a ni," tiin a sawi.

Neymar chungchang sawiin Pele chuan, "Brazilian hi ka ngaina a, player ṭha Neymar pawh a inkhel ka hmuh tirha thiam ka tih ang khan a la thiam reng. Ram tana ka goal khung zat a rawn hnaih zel pawh hi ka lawmpui," a ti.