Kan inpeih chiang tawh - Marquez

Marc Marquez chuan a dar hliam leh a ban ruh na a dam chian tawh thu a sawi. Pathianni tlai dar 5:30 hian Sachsenring tlankawngah 2021 MotoGP German GP an tlan dawn, inelna hmuhnawm a beisei ngam ang.

Repsol Honda rider hi season hmasa intlansiak hmasa berah a inhliam a, inelna a hmachhawn zui thei lo. Tun season tir lamah inlan thei lo mah se tun hnaiah a inlan thei a, hnehna erawh a la chang thei rih lo.

Spanish tlangval Marquez chuan, "Hliam ka tawrh chinah chuan tun ṭuma inelna kan neih tur hi ka phur ber leh, natna vanga ka buai loh ber ṭum a ni hial awm e," tiin German rama inelna hmachhawn a châk tawh thu a sawi.

Tun season inelna pasarih an neih tawh chinah chuan Fabio Quartararo-a'n point 115 hmuin hma a hruai a, pahnihna dinhmun luahtu Johann Zarco chuan point 101 a nei ve tawh bawk.