Eriksen-a'n khawl a hmang tawh dawn

Denmark midfielder Christian Eriksen chu a lungah khawl dah a ni dawn a, hei hi a lungin hna a thawh tur ang tak a thawh theihna tura tih a ni.

Euro 2020 khelh mekah Eriksen hi Denmark team tana feh chhuak zingah a tel a, an match hmasa bera Finland nen an inkhelh ṭumin nikhaw hre loin Eriksen hi a tlu.

Damdawi in lama hruaia enfiah a nih hnuah Eriksen hian lung lam fel lo a nei tih hmuhchhuah a ni a, a lung pui turin ICD (implantable cardioverter defibrillator) chu a taksaah an dah.

Danish team doctor Morten Boesen chuan, "ICD hian a lung chu a nih ang taka hnathawk turin a pui thei dawn a ni," a ti a, Eriksen chu damdawi inah la awm mah se a ṭhat tawh thu a sawi bawk.

Boesen chuan, "Christian hian a damna tura ruahmanna hi a pawm a, a dinhmun angah hi chuan hetianga hma lak mai hi national leh international level-a specialist zawng zawng pawhin an rawt vek a ni," a ti.

Khelmuala Eriksen a tluka bawisawmtu German doctor Jens Kleinfeld chuan, "Second 30 hnuah khan a mit a rawn meng a, thil lawmawm tak a ni - khatiangah chuan harh chhuah lehna chance kha a chhe takzet," a ti.

Eriksen hian khelmualah khan, "Kum 29 chauh asin ka la nih," tiin Kleinfeld hi a hrilh a, German doctor chuan, "A kum zat a rawn sawi khan a thluak lam chu a fel tih ka hre thei nghal a ni," tiin a sawi bawk.

Netherlands leh Ajax defender Daley Blind chuan December 2019 khan lung harsatna a lo tawk tawh a, Eriksen ang tho hian ICD chu a taksaah vuah niin February 2020 khan inkhel turin a lo kir thei - Euro-ah pawh a inlan a, Netherlands tan 3-2 a Ukraine an hnehna inkhelah khan bul a ṭan.

Kum 2016-a lung lam harsatna lo nei tawh, England cricketer James Taylor pawh a taksaah ICD vuah a ni a, ani erawh a inkhel zui thei ta lo.

James Taylor chuan, "Ka sawithiam theih dan awlsam berah chuan mobile phone phel lehlam ang tiat vel hi a ni a, chu chu kan taksa chhungah vuahin wire pahnih nen a inthlun zawm a, wire hi kan lung hnuai lamah a lut thung.

"A tirah chuan ICD vuah ngai kha hrehawm ka ti khawp a, mahse, ka dinhmun dik tak hrechianga ICD-in min puih theih dan ka hriat hnu kha chuan, ka tan ṭhian ṭha ber a ni tawh," tiin a sawi.