Milwaukee Bucks an la tlawm lo Game 7 an khelh a ngai dawn

NBA Eastern Conference semifinal aṭangin Milwaukee Bucks an la tlawm mai duh bik lo, nimin zing khan Bucks hian Brooklyn Nets 104-89 in an hneh a, team pahnih hi best of seven series-ah 3-3 in an inhnehtawk mek.

June 20, Pathianni zing dar 6:00 hian game 7 an khel leh dawn a, a chak zawkin conference final an lut ang. Game 7 khelhna tur Barclays Center hi Brooklyn hman thiam a ni a, an match khelh hnuhnung pathumah an chak vek avangin Bucks tan a awlsam dawn lo.

Nimin zing khan Fiserv Forum-a inkhelah Milwaukee Bucks kha chak lo ni se la chuan an season a tawp ang, thi leh dam kara leng an ni. Brooklyn Nets tan Kevin Durant leh James Harden ten inkhel bul an ṭan avangin hmabak a ko takzet.

Game 5-ah Bucks hian Durant an dang thei lo, pont 49 ngawt a nei a nih kha. Game 6-ah erawh American star hi theihtawpa dan an tum a, point 32 chu nei tho mah se basket neih tuma vawi 30 a shoot zinga a zatve chauh a hlawhtlin tak avangin Bucks lamin hna an thawk ṭha.

NBA Most Valuable Player vawi hnih ni tawh Giannis Antetokounmpo chu Milwaukee lam rinrawl a ni zel. Greek tlangval hian point 41 a neih bakah rebound vawi 17 lain hnehna an chan theih nan a thawhhlawk hle.

Antetokounmpo bakah hian point 38 zet neitu Khris Middleton chu Bucks tana player ṭangkai a ni a, conference final an luh theih nan chuan player pahnih hian Nets khelmualah an thiam thil an show leh ngei a ngai dawn a ni.

Middleton chuan, "Kevin Durant leh James Harden ten an duh anga hna an thawh theih loh nan theihtawp kan chhuah a, kan hlawhtling thawkhat chuan a lang. Playoff hi chu a boruak a danglam a, tlemte leka hmahruai zeuh theih pawh hi a ṭangkai zual bik," a ti.

NBA champion tum Nets coach Steve Nash chuan, "Bakset kan nei hleithei lo a, keimahni lam kan inveng ṭha tawk lo bawk. Game 7 chu keimahni court-ah kan khel ang," tiin an khelmualah fans puihna nen chak theih a inbeisei sang hle.