Denmark beiseina a la thi lo

Match hnih an tlawm tawh a, an player pawimawh Christian Eriksen chân tawh bawk mah se Denmark tan Euro 2020 last 16 luh beiseina a la nung; zanin dar 12:30 hian Russia nen an group match hnuhnung ber an khel ang.

Group B aṭangin hmahruaitu Belgium an tlang chiang tawh a, anni hian Finland an hmachhawn dawn. Denmark, Russia leh Finland-te hi tlang thei vek, mahse tla thei vek an la ni bawk; inkhel a hmuhnawm dawn tih a chiang.

An tum ruh
Denmark-in hneh ngei tura ngaih Finland an hmachhawn ṭumin Eriksen a tlu a, rilru khingbai tak chunga match an khelh chhunzawm hnuah 1-0 in an chak lo; team ṭha Belgium lakah 2-1 in an tlawm zui leh bawk.

Eriksen hi inkhel thei tawh rih lo mah se damdawi in aṭangin a chhuak tawh. Eriksen tlukna Parken Stadium-ah zanin hian chak ngei an duh dawn, player mai bakah fans thlengin thapui an thawh dawn tih chu thil chiangsa a ni.

Belgium an hneh loh hnuah Martin Braithwaite chuan, "Group stage kan paltlang tur a ni, kan team tan chuan theih loh leh tawp chin a awm ve lo," a ti. Russia lakah goal hnih china hnehna an chang thei a nih chuan pahnihna dinhmun an la luah thei tih a hria.

Barcelona striker hian Belgium lakah goal khung theihna hun ṭha a hlah nual, a thusawi anga last 16 luh ngei a duh a nih chuan 'goal' a khung a ngai tawh dawn. Red Devils laka an khelh dan chhut chuan Denmark hian goal an khung theih a rinawm.

Denmark coach Kasper Hjulmand chuan, "Eng pawh chu ni se, hnehna chan tumin kan thawk chhuak dawn. Russia hi team ṭha tak ni mah se, kan tan inelna hi a la tawp bik loh avangin thapui kan thawh dawn," a ti a, tihsual neih loh a duh thu a sawi bawk.

Russia beiseina
Russia hi an hma hun chu an kuta awm a ni, team dang result ngaihchan ngai miah loa tlang an duh a nih chuan Denmark an hneh a ngai. Chutihrualin 2008 hnu lamah Euro-ah hian knockout stage an la luh leh loh avangin inrintawkna an nei tlem dawn.

Euro 2012-a an match hmasa berah Russia hi an chak a, a hnu lamah chuan Finland an hneh kha chak ni hmel an hmuh lehna hmasa ber a ni hial. Zanina chak tur chuan Aleksei Miranchuk a pawimawh dawn, Atalanta midfielder hian Finland lakah goal hlu bik a khung.

Ram tana goal 29 khung tawh, captain Artyom Dzyuba-a'n tun inelnaah goal a la khung lo a, ram tana goal khung hnem ber Alexander Kerzhakov (30 goals) tluk tura goal khat a la mamawh hi Denmark lakah a khung thei a nih chuan a lawmawm zual bik ang.

Russia hian Denmark player chauh an hmachhawn dawn lo a, stadium khata mipui pungkhawm an khelh tel a ngaih dawn avangin an hmabak a hautak dawn. Chutih rualin point khat lek pawh an hmuh belh thei a nih chuan an dinhmun a ṭha dawn.

Inlan tura beiseite
Russia: Safonov; Barinov, Diveev, Dzhikiya; Mário Fernandes, Zobnin, Ozdoev, Karavaev; Miranchuk, Golovin; Dzyuba
Denmark: Schmeichel; Mæhle, Kjaer, Christensen, Wass; Damsgaard, Hojbjerg, Delaney; Poulsen, Cornelius, Braithwaite