'The Flying Sikh' Milkha Singh a thi

Infiamna khawvela hming dai tawh ngai lo tur, Indian tlan chak hmingthang Milkha Singh chu Covid-19 vangin Zirtawpni khan a thi a, kum 91 mi a ni.

A tlan chak em avanga 'The Flying Sikh' hming lem an pek Milkha Singh hian Asian Games-ah India tan gold medal pali a hlawh chhuak a, Commonwealth Games, 1958-ah gold medal a dawng bawk.

Milkha Singh-a'n Commonwealth Games-a gold medal a hlawh chhuah hi India-in he infiamna khawmpuia gold a lâk hmasak ber a ni a, ngaihhlut a hlawh hle.

Chu mai a ni lo - Cardiff khawpuia 400m intlansiaka gold medal hlawh chhuak tur hian hetihlaia world record chelhtu Malcom Spence chu a khum a, 46.6 second chhungin a thleng.

Kum 1960 Rome Olympic-a palina a nih kha tun thlenga India infiamna khawvela sawi hlawh a ni - he infiamna khawmpuiah hian 400m intlansiakah 0.1 second leka thleng tlaiin bronze medal a hlawh chhuak zo lo.

Milkha Singh hian thla hmasa khan Covid-19 hi a kai a, kar hmasa lawk khan a nupui Nirmal Kaur, India volleyball captain hlui chu Covid-19 vang thoin a lo thi tawh a, kum 85 mi a ni.

The Flying Sikh hian a fapa pakhat leh fanu pathumte a kalsan. A fapa hi Indian golfer lar Jeev Milkha Singh a ni a, kum 49 mi Jeev Milkha Singh hi international tournament 14 ngawta champion thei a ni bawk.

India prime minister Narendra Modi chu Milkha Singh thlah hmasatu zingah a tel a, Modi chuan, "Infiammi ropui tak, he ram duhthusamte a tak ram thlentira chhiar sen loh Indian mipuite thinlung luahtu chu kan chan ta. A nun duhawm tak kha mi tam tak fuih phurtu a ni a, a kal ta mai hi na kan ti takzet a ni," a ti.

Kum 2013 khan Milkha Singh chanchin hi bollywood film Bhaag Milkha Bhaag (Tlan rawh, Milkha, tlan rawh) tih hming chawiin siam a ni a, box office-ah India pawisa tluklehdingawn 2.1 zet a hmu chhuak a ni.

He movie hmuhnawm taka Milkha Singh lema chang Farhan Akhtar chuan, "I liam ta tih hi pawm thiam mai ka la harsat fan a, i luhlul em emna pakhat ka chhawm ve vang a ni mahna.

"Ni e, i thinlungin i duh tawh chu i duh tlat zel a, i beidawng ve ngai lo a nih kha. Thudik chu hei hi a ni - i nung reng dawn," tiin a thlah a, "Beiseina leh suangtuahna mawi taka lantir tu," tiin a sawi bawk.