European champion hmaah German ral a lian e

Germany-in Euro 2020 an match hmasa berah world champion France an hneh lo a, an chak lohna hmun hi an mual 'Allianz Arena' a ni. Goal khungtu nei lo, khelh dan mumal nei lo, player thlang fuh lo leh manager vanglai pel tawh tiin Die Mannschaft chanchin an sawi zui.

Inrinni zanah Germany-in Portugal an mikhual a, Cristiano Ronaldo hmangin European champion-in goal an khung hmasa a, pressure ngah sa Joachim Low leh a hote hmabak a thim hle. Germany-in an mualah tlawm nawn an hreh tih lantirin huaisen takin an bei let a, hun harsa aṭangin an thawk chhuak a, 4-2 in hnehna an chang.

Die Manschaft nawr nat vangin Portugal defender pahnih Ruben Dias leh Raphael Guerreiro ten an lamah an khung a, second half-ah Kai Havertz leh man of the match-a thlan Robin Gosens ten mualneitu lam tan an khung belh. Portugal-in mualpho hliah khuh nan Diogo Jota hmangin siphurt an sut ṭhen a, German ral lian do let nan a tawk zo lo.

A hming chu Ronaldo
Germany-in tun hnaiah result nei ṭha tawk lo mah se Euro bika record nei ṭha ber an ni a, an muala khel an ni bawk. An khingpui Portugal hi European champion an ni ringawt lo a, Euro 2016 an champion lai ai khan an ṭha tawh zawk.

Joachim Low leh Fernando Santos ten match hmasa bera bul ṭantute chungah rinna an nghat nawn a, Portugal-in defensive midfielder pahnih Danilo leh William Carvalho te bul an ṭan nawn tir danah goal venhim an ngai pawimawh tih a lang.

Germany-in nung takin inkhel bul an ṭan a, wing back Gosen-a goal khung chu Serge Gnabry offside vangin pawm a ni lo. Portugal-in game plan an nei ṭha tih a lang a, minute 15-naah counter attack hmanga Germany chhu letin Ronaldo hmangin goal an khung.

Corner aṭanga ball per chhuak chu Bernardo Silva-a'n chak takin a la chhuak a, goal khung tuma Ronaldo rawn tlan chhuak chu pui tak a ni. Manchester City midfielder Bernardo Silva hian Ronaldo pe loin vengtu nei lo Diogo Jota zawk a pe a, Liverpool forward hian duhsak takin team captain a pe ve leh a, Ronaldo-a'n a pet goal chiang hle.

Toni Kroos-a'n corner a pet aṭanga Ronaldo-a'n goal a khung thleng hian second 14.2 chauh a ni a, Portugal-in a bu ang thlapin an vaw let. Portugal captain hian goal 107 a khung ta a, ram tana goal khung tam ber Iran striker Ali Daei (109) a tluk lohna chu goal hnih chiah a ni ta.

German ral lian
Germany an hlauthawng a, an khelh dan erawh a ngai reng. Low-a hoten goal khung tumin na takin an nawr a, right wing back Joshua Kimmich chu winger ang mai a ni a, defence laia awm Matthias Ginter chu right back postion-ah a awm. Tlarhmaa awm Serge Gnabry goal bawh a na a, Thomas Muller a thawkrim a, Toni Kroos-a'n a tih ṭhin danin ball a sem kual a, mi thar Robin Gosens a rawn vul hle.

Atalanta inkhel en tawh tan Gosens hi mi thar a ni tawh lo a, Germany-ah erawh mi thar a ni. Kum 26 mi Gosens shot-cross chu Portugal defender Dias-a'n minute 35-naah an lamah a ti lut a, 1-1 a ni. Minute 39-naah Antonio Rudiger, Gosen leh Muller te ball an inpek kual hnuah Kimmich-a'n a cross let a, Raphael Guerreiro-a'n an lamah a ti lut.

Goal hnih khung phuin Germany an khel ṭha a, second half-ah pawh a danglam lo. Minute 61-naah Muller-a pass chu Gosens-a'n vei lam aṭangin a cross lut a, Havertz-a'n goal-ah a chantir. Minute 60-naah Gosens-a'n a khung ve ta thung a, dinglam aṭanga Kimmich-a cross duhthusam chu Atalanta defender hian a tauh goal.

Fernando Santos-a'n attacking player nei ṭha chungin goal venhim a thlang a, a tisual. German wing back Kimmich leh Gosens ten Portuguese wing back Nelson Semedo leh Raphael Guerreiro te an chaih phar a, Joachim Low-a'n tactical battle-ah hnehna a chang.

Hmuhnawm leh ngaihnawm
Joachim Low-a'n chak chiangah a inngai a, 4-1 a nih hnuah Mats Hummels leh Gosens te a la chhuak. Germany an chungnung bik ta lo a, Portugal-in tlawm mai an tum lo bawk. Minute 67-naah Ronaldo pass ṭha bik chu Jota-a'n goal ruakah a khung a, 4-2 a nih hian minute 23 khelh tur a la awm avangin Low-a hote nuam sain an awm thei lo.

Renato Sanchez-a'n goal ban a pet per a, Portugal leh Germany-in goal khung theihna chance nei chhunzawm mah se goal dang hmuh tur a awm tawh lo. European champion Portugal-in group match hnuhnung berah France an hmachhawn dawn a, an chak lo a nih chuan tla thei an ni.

Germany pawh Portugal hneh vangin phur viau mah se point thum chauh an la hmu a, an la him bik lo. Group of death tia sawi group F-a awm France, Germany, Portugal leh Hungary ten besei an la nei vek a, group match tawp bera an inkhel tur hi a hmuhnawm khawp ang.

Inelna lian hnuhnung pangaa Germany leh Portugal inhmachhawn ṭumah Germany an chak vek
2006 World Cup 3-1
2008 Euro 3-2
2012 Euro 1- 0
2014 World Cup 4 - 0
2021 World Cup 4 - 2

Player inlante
Portugal: Rui Patrício; Nélson Semedo, Rúben Dias, Pepe, Guerreiro; Danilo, William Carvalho (Rafa Silva 58); Diogo Jota (André Silva 83), Bruno Fernandes (Moutinho 64), Bernardo Silva (Renato Sanches 46); Ronaldo
Germany: Neuer; Ginter, Hummels (Can 63), Rüdiger; Kimmich, Gündoğan (Süle 73), Kroos, Gosens (Halstenberg 62); Havertz (Goretzka 73), Müller; Gnabry (Sané 87)

Kan theihna hi kan ringhlel ngai lo. France nena kan khelh zawh khan kan ṭhat dan ber kan la zawng a, tlarhma tih chak kha kan thutlukna a ni. Huaisen takin kan bei a, kan rilru put hmang a dik. Team ṭha tak kan hmachhawn chungin na takin kan nawr a ni. - Joachim Low, Germany coach

Bul kan ṭan ṭha a, tlarhnung kan rem phui ṭha. Germany buaina tur bera kan ngaih hmangin counter attack hman ṭangkai kan tum a, a tir lamah kan ti hlawhtling. Germany kha an khel ṭha zawk ngei a, mahse kan chance neih kha khung ilang chuan result a danglam thei ang. - Fernando Santos, Portugal coach