Hungary-in world champion an chelh

Ferenc Puskas Stadium-ah Hungary-in France an barakhaih a, mipui sing ruk ṭanpuinain world champion nen 1-1 in an inhnehtawk.

Inrinni zan inkhelah hian mak tak maiin Hungary-in Attila Fiola hmangin first half-ah hma an hruai a, Les Bleus-in Antoine Griezmann hmangin siphurh an sut.

Covid-19 vangin Budapest-a inkhel hi chu entu vang ringawt pawhin hmuh a nuam a, Hungary leh France hian inkhel hmuhnawm an pho chhuak hrim hrim. Mualneitu lamin bul ṭan ṭha mah se Les Bleus an insiamrem a, Karim Benzema leh Kylian Mbappe ten chance ṭha an hlah.

Hungary buaina belhchhah turin captain Adam Szalai chu hliam vangin lakchhuah a ni a, player ṭha bik Mbappe ball pek duhthusam chu Benzema-a'n goal ruakah a khung lo. Amaherawhchu first half injury time-ah thil mak a thleng a, Fiola leh Roland Sallai ten one-two hmangin Benjamin Pavard leh Raphael Varane te an paltlang a, Fiola hian goal pawimawh a khung.

Second half-ah France pawh an chungnung a, Mbappe thawhrah sengin Griezmann-a'n minute 66-naah siphurh a sut. Les Bleus chak turah an ngaih theih a, mahse Hungary-in tlawm an tum bik lo. Keeper Peter Gulacsi-a'n huai takin Mbappe goal khung tur a dang a, Raphael Varane-a'n a chance ṭha neih goal zawnah a tauh lo.

France midfielder Paul Pogba leh N'Golo Kante ṭhatzia an sawi a, Inrinni zanah erawh Hungarian midfielder Laszlo Kleinheisler a langsar ta zawk. Kleinheisler hi 5ft 7in chauha sang a nia, kum 27 mi niin Croatian club Osijek-a khel a ni.

Player inlante
Hungary: Gulácsi; Botka, Orbán, At. Szalai; Nagy; Négo, Kleinheisler (Lovrencsics 84), Schafer (Cseri 75), Fiola; Ad. Szalai (Nikolic 26), Sallai
France: Lloris; Pavard, Varane, Kimpembe, Digne; Pogba (Tolisso 76), Kanté, Rabiot (Dembélé 57, Lemar 87); Benzema (Giroud 76), Griezmann, Mbappé

Ka player-te khan an tih tura ruahman angte an ti a ni mai lo a, huaisen leh ram tana inpekna zawng zawng nen an ti hlawhtling. Mi tam tak chuan coach game plan hi a pawimawh berah a ngai a, an ni ngawt lo. Player-te inpekna hi a pawimawh a, kan khelh dan kha ka beisei phak bak a ni. An chunga lawmthu sawi mai loh chu tih theih dang ka nei lo. - Marco Rossi, Hungary coach

Kan result-ah ka lawm chiam lo a, mahse ka lungawi. Kan tlawm lo a, kan point thum neih sa belhna tur point kan hlawh chhuak. Group match hnuhnung ber kan khelh turah pawh zau zawkin kan thlir phahin ka hria.
- Didier Deschamps, France coach