Kumpinu Lalram lawm dan a inchen lo Scotland an hlim - England an ngui!

Euro 2020 a ngaihnawmin a hmuhnawm chhunzawm zel - Zirtawpni zan khan British derby khelh a ni a, England leh Scotland chu 0-0 in an inhnehtawk.

England-in point li an neih tak avangin last 16 lut tawh ang hiala sawi ngam an ni a, mahse, an inhnehtawkpui hi an hmelma kumhlun Scotland an nih miau avangin fans an lawm lo a, auh elna nen player-ten stadium an chhuahsan.

Scotland erawh team ṭha zawka ngaih England an inhnehtawkpui avangin an hlim a, point thum hlawh chhuak ang maiin an result chu an lawm - Thawhlehni zanah an match tawp ber khelin Croatia an hmachhawn dawn a, lawm viau erawh a la hun lo.

England hian Thawhlehni zanah vek group stage-a an match tawp ber an khel dawn a, anmahni ang thoa point li nei tawh Czech Republic nen an inkhel ve leh ang.

Beisei phak lo
England-in an match hmasa berah Croatia an hneh avangin fak an hlawh a, English media lam chuan champion ang thaw thangin an chhuah leh hman der tawh - mah se Zirtawpni zanah a tak ram tem tir an ni a, Three Lions hian champion an mitthla dawn a nih chuan insiamṭhat an mamawh.

Croatia laka an inkhel ang thoin England-in bul an ṭan ṭha a, Mason Mount-a corner pet aṭanga John Stones-a woodwork tauh perte chu uiawm a tling. Mahse, hei hi England chak teuh lai ber a chang zui!

Scotland tana khel ṭha tak Stephen O'Donnell-a chance duhawm chu England keeper Jordan Pickford-a'n ṭha zetin a dang a, Reece James chuan Lyndon Dykes-a khung tur ni ngeia lang chu goalline aṭangin a lo tauh chhuak hman bawk.

Three Lions hian minute 90 chhungin vawi kua shot an nei a, mahse, vawi khat chiah target zawnah a kal. Scotland-in vawi 11 shot an neihah vawi hnih target-ah a kal thung a, a tawpah point insem chungin team pahnihin lungawi an zir a ṭul.

Southgate leh thutlukna
England boss Gareth Southgate-a'n Croatia an hneh ṭumin mak takin thutlukna a siam a, left back-ah player ṭha Luke Shaw leh Ben Chilwell a nei chungin right back Kieran Trippier a luhtir a, he thutlukna hian sawi zui a hlawh hle.

Trippier a khel chhe hran lo a, Southgate-a'n a thutlukna siam chhan sawifiah zuiin, "Centre back-ah Tyrone Mings hman a ṭul a, tawnhriat a la ngah loh avangin amah pui turin Trippier a luh a ngai a ni," a ti.

Mahse, Croatia ai maha inkhel boruak sangah Mings-a'n inkhel bul a ṭan chungin Trippier luh nawntir a ni lo a, Luke Shaw a lut a, mual ding lamah tawnhriat nei tlem Reece James a awm bawk - tlarhnunga English defender zingah John Stones (44 match) chu ram tana inlan hnem ber a ni a, defender dang pathum inlan zat belhkhawmin Stones-a inlan zat a phak lo!

Tawnhriat nei tlem England tlarhnungin nghin chang an nei fo a, Three Lions vanneih zan ni lo se kut ruakin Wembley an chhuahsan hial ang - dem tur an awm a nih chuan Southgate chu dem tur a ni.

Clarke a che fuh
England boss Southgate-a'n thutlukna a siamsual a, hetihlai hian Scotland coach Steve Clarke erawh a thutlukna avangin fak a phu - Clarke hian Czech laka chak lo a team aṭangin player pali ngawt a siksawi a, awmzia a nei thung.

Manchester United midfielder Scott McTominay chu tlarhnung lamah pawh let a ni a, 3-5-2 formation-ah defender pathum zingah a tel a, Andy Robertson leh O'Donnell-ten wing back hna chelhin goal nawr pui tura dah an ni.

Hliam vanga match hmasa ber inlan thei lo Arsenal defender Kieran Tierney chu tlarhnungah bul ṭantir a ni a, Celtic midfielder Callum McGregor leh Southampton striker Che Adams-te pawh Czech laka bul ṭan lo England laka bul ṭan zingah an tel.

Kum 20 mi Billy Gilmour chu a vawi khat nan Scotland tana bul ṭantir a ni a, Clarke-a'n England lakah player pali ngawt a thlak danglam tihna a ni a, coach huaisen lo tan thutlukna siam ngam chi niin a lang lo.

Thutlukna dik
Tierney-a'n bul a rawn ṭan hi a mak lo a, match hmasa zawkah pawh inhliam lo se bul ṭan tur chiang a ni - Adams leh McGregor bul ṭan pawh thil mak tia sawi tur a ni lo a, thutlukna pangngai ni maiin a lang.

Mahse, Clarke-a'n tlarhnunga Tominay a pawt let chu thil mak tih loh rual a ni lo a, Scotland tana vawi hnih bak la khel lo Gilmour-a'n match pawimawh lutuka bul a rawn ṭan chu thil mak a tling bawk.

Tlarhnungah Tominay a khel ṭha takzet a, chu zawng aia sawi hlawh erawh Gilmour a ni. Chelsea rawlthar duhawm hian a pu rinna a tithlawn lo a, hun tawp nan minute 14-a la awm tihah lakchhuah a ni chungin Scottish player zingah pass dik nei hnem ber a ni hman a, vawi 40 a pass dik hman a, a pass zat aṭanga chhiarin 91% a tling.

Gilmour hian vawi li chiah pass sual a nei a, vawi riat zet an khingpui ball a chhuh letsak bawk - midfield-ah roreltu a ni a, England midfield-in an duh anga hna an thawh theih loh chhan langsar a ni. Scotland captain Andy Robertson chuan, "A sang ber zingah a tel," tiin Gilmour-a khelh dan chu a fak.

Khawiah nge Kane?
England inchhuanna ber chu tlarhma a ni a, mahse, Scotland lakah Croatia laka 'bo' tawh Harry Kane a bo nawn avangin Three Lions tan tlarhma lamah ngaihtuahna sen nawn a ṭul - champion an tum chuan Kane-a'n goal a khung a ngai!

Kum 27 mi striker hi a tlan tam tawk lo a, a taima tawk lo a, Scotland tan hna hautak a siam meuh lo - chutihrual chuan Kane hian Spurs lama a khelh dan angin midfield thlengin ball a zawng a, defender a pawt khawm a, mahse, a hmun awl siam a ṭhianten an chhawr thei lo a, ball ṭha hmuh tur a nei lo bawk.

City rawlthar duhawm Phil Foden-a'n English footballer ropui Paul Gascoigne tih dan entawnin a sam tibuang mah se sam buang tih lohah chuan Gazza anna a la nei rih lo a, amah thlaktu Jack Grealish tan danglamna thlen viau turin hun a tam tawk lo.

Southgate-a'n a player chuam Raheem Sterling a la hman chhunzawm zel ang em? tih chu zawhna langsar a ni a, English coach-in champion a mitthla dawn a nih chuan Marcus Rashford leh Jadon Sancho-te 'enchhin' ve a hun tawh.

Kan huaisen tawk lo a, dawhtheihna kan mamawh hunah kan dawhthei tawk lo ṭhin bawk. Kha aia ṭha zawk khan kan khel thei tih ka hria a, kan mamawh tak point kan hloh a ni. Hnehna chan a, last 16 luh mai kan duh a, mahse, kan tih theih miau loh avangin na taka inpet ang mai a ni. Mahse, indawm kun erawh kan tum lo. Tournament football a ni a, match zawng zawngah hnehna chan vek theih a ni lo a, chetsual chang chu a awm ve tur a ni. Top team dang, draw result nei pawh an awm ve tho a, a êng zawnga thil thlir a, Thawhlehni zan atana inbuatsaih mai hi kan tih tur chu a ni. - Gareth Southgate, England manager

Ka team enkawl ṭhatzia ka hria a, ka naute khelh dan kha mak ka ti miah lo. Czech laka kan khelh dan avangin sawiselna an tawk nasa a, zaninah khan anmahni sawiseltute chu an ngawihtir ta a nih kha. Tun hnai thla 18 chhung chu he team hian ṭha takin an khel tawh a, an ram tan an theihna zawng zawng an hlan a ni - hei aia an chunga zahna lantir lehzual hi an phu takmeuh. Kan match hnuhnung bera beiseina kan neih theih nan hna kan thawk a, tunah chuan kan chawl hahdam ang a, Croatia laka cup final khel turin kan inpeih ang. - Steve Clarke, Scotland coach