Spain an chelh leh tawh!

Euro 2020-a match hnih an khelh tawhah Spain an la chak lo. Luis Enrique naute hian 0-0 a Sweden an inhnehtawkpui hnuin Inrinni zan khan Poland an hmachhawn a, 1-1 in an inhnehtawk.

Spain tan Alvaro Morata chuan goal hmahruai a khung a, La Roja hi an chak ve tawh mai dawna ngaih a nih laiin Robert Lewandowski chuan si phurh sutna goal a khung a, hun tawp thlenga goal dang lut loin an ṭin.

Zirtawpni zan khan Sweden chuan 1-0 in Slovakia an hneh bawk a, Emil Forsberg chuan inkhela goal awmchhun hi penalty hmangin a khung - group E-ah point li hmuin hma an hruai mek.

Danglamna Moreno
Spain boss Luis Enrique a fimkhur a, Sweden lakah goal khung thei player a neih loh avangin Swedish team laka bench-a awm Gerard Moreno chu inkhel bul a ṭantir a, Villarreal striker hian danglamna a thlen nghal.

Minute 25-na lekah Moreno hian Morata tan ṭha zetin a siamsak a, Sweden laka goal a khung theih loh avanga sawisel hlawh striker hian goal-ah a chantir - referee-in offside nia ngaiin VAR rawn zet mah se goal hi pawm a ni.

Mahse, Spain hlim chhung erawh a rei lo - Slovakia laka an tlawm ṭuma beisei phak lo Robert Lewandowski a inlar a, Bayern Munich striker hian minute 54-naah an ram beiseina chhi nung turin si phurh a sut.

Spain an vanduai
Lewy goal khung aṭanga minute li hnu lawkah Moreno-a'n penalty a hlawh chhuak a, pet turin a pen chhuak. Mahse, season hman zawh taka Villarreal tana goal 30 khungtu striker hian goal-ah a chantir thei lo a, a per lehlam chu Morata-a'n a hmaah goal ruak a awm chungin a pet goal tlat lo!

Enrique-a'n goal khung duhin Manchester City forward Ferran Torres leh Paris Saint-Germain forward Pablo Sarabia a luhtir a, Torres hian chance duhawm nei zui mah se a chhawr thei bik lo - Spain an vanduai chhunzawm zel.

Goal a khung zanah pawh Morata hming a ṭha rei hleithei lo a, a goal hnihna khung turin hun ṭha nei leh mah se Juventus tana a khelhpui, Poland goalkeeper Wojciech Szczesny chuan ṭha zetin a dansak a, 1-1 in inkhel a tawp.

Spain an vai!
La Roja-in passing game hmuhnawm 'tiki-taka' an larpui a, 2008-2012 inkarah phei chuan he football game mawi bik hmang hian Euro nomawi pahnih leh World Cup nomawi an chawi hial.

Spain-in an thiam thil hi an la theihnghilh lo a, Sweden lakah phei chuan vawi 954 zet an in pass dik - Poland lakah pawh 77% zet ball chang chungin inkhel an thunun a, a pawimawh ber goal an hlawh chhuak thei lo chu an buaina a ni.

La Roja player-te an huaisen tawk lo a, Poland tlarhnung inremphui ṭha tak su hawng tura passing awmze nei aiin a him ringawt zawng chunga ball inpek kual a tam zawk a, a tawpah an duh ber point thum an hmuh loh phah.

Hmahruaitu Sweden
Spain awmna group E-a rin loh taka hmahruaitu ni mek chu Sweden an ni a, 1-0 a team nem zawka ngaih Slovakia an hneh avangin match hnih an khelh aṭangin point li an nei ta.

Slovakia keeper che ṭha tak Martin Dubravka chuan minute 77-naah Robin Quaison ti tluin penalty a chawi a, RB Leipzig winger Emil Forsberg chuan goal-ah a chantir - Euro-a minute 365 zet goal an khung loh hnua Sweden-in goal an khung lehna hmasa ber a ni.

Sweden tan kum 21 mi Alexander Isak a langsar a, season hmasa La Liga match 34 a khelh aṭanga goal 17 khungtu forward hi Sweden-in sang tak thlen an tum chuan a khelh ṭhat a chhunzawm a ṭul ang.