Croatia-in ngai an awh thei lo

Croatia sawi chuan World Cup 2018 final an luh kha a mitthla loh theih loh a, mahse, he team hian kum 2018 hnuah ngai an awh leh tawh lo tih khelmual chhungah a lang chhuak leh ta.

Zirtawpni zan khan chak mamawh Croatia hi Czech Republic nen 1-1 in an inhnehtawk a, last 16 lut tur chuan an match hnuhnung berah Scotland an hneh ngei a ngai dawn - a awlsam lo ang.

Croatia-in Czech Republic lakah England laka khup hliam vanga an chhawr theih loh Dejan Lovren an nei let a, Liverpool defender hlui an neih let avanga an lawmna erawh minute 37-naah thaichhiatin a awm nghal.

Lovren hian Czech striker pasang Patrik Schick chu a kiuin a nghawk niin a lang a, a tirah referee-in hmu lo mah se video assistant referee a rawn hnuah sawisel theih takin penalty a pe.

Scotland laka goal hnih khungtu Schick a lo pen chhuak a, Bayer Leverkusen striker hian hnar thi chunga goal khung turin harsatna a nei lo.

Croatia-in an nawr let nghal a, Ante Rebic chuan chance duhawm nei mah se kum 27 mi forward hi thleng sang tur chuan Croatia-in forward ṭha zawk an mamawhzia pholanna mai a ni a, holam takin a hlah.

Mahse, Croatia an ngawi reng lo - second half ṭan aṭanga minute hnihna lekah Ivan Perisic chuan ama thawhrah sengin si phurh sutna goal a khung a, he goal lut tur hian Andrej Kramaric freekick aṭanga a ball hmuh chu Perisic hian ṭha taka tlan luhpuiin Vladimir Coufal a bum a, Tomas Vaclik man theih loh turin a pet goal.

Inter Milan winger Perisic hi Croatian player zinga major tournament palia goal khung thei hmasa ber a ni a, World Cup 2014, Euro 2016, World Cup 2018 leh Euro 2020-ah te goal a khung ta.

Perisic-a'n record duhawm a siam lai hian Croatia erawh record duhawm loin a zui a, World Cup 2006-a a vawi khat nan major tournament-a an match hmasa pahnihah hnehna an chang zo lo.