Messi hoin Argentina an chak
Argentina chuan Guido Rodriguez-a goal khat hmangin Uruguay lakah 1-0 in hnehna an chang. Lionel Messi awmna ram hian Copa America 2021 khelh laiah point li hmuin group A hmahruaitu an ni.
Inrinni zing inkhel dangah Chile chuan Bolivia lakah si khat fai bawkin hnehna an chang a, goal awmchhun hi minute 10-na leka Ben Brereton khung a ni; Chile hian Argentina ang bawkin match hnih aṭangin point li an hmu ve bawk.
Argentina captain Messi chuan, "Hnehna chan hi a pawimawh, kan hmabak pawh a la hautak tih kan hriat a ngai," tiin inelna a lak thutak thu a sawi. Copa America final vawi thum a khelh tawha chak lo vek forward hian champion a duh takzet.
Goal khat a tawk
Estadio Nacional de Brasilia-ah group hmahruaitu nih rinkai pahnih an intawng. Argentina tan an match hnihna a nih laiin Uruguay tan erawh tun inelna bika an match hmasa ber a ni thung, group pakhatah team panga an awm avangin an inkhel rual vek thei lo.
Minute 13-na lekah Messi-a'n mual sir lamah ball a chang a, amah vengtu defender a paltlang hnuah box chhunga a cross lut a, ram tana a vawi khat bul ṭanna Rodriguez-a'n chiang zetin a lo tauh lut.
Luis Suarez leh Edinson Cavani te awmna Uruguay lamin an nawr let hleithei lo. Manchester United striker Cavani-a'n penalty hlawh chhuak turah inngai mah se pek a ni lo a, minute 90 chhungin goal zawna pet an nei lo.
Argentina captain Messi-a'n goal khung lo mah se Albiceleste tan a thawhhlawk, khingpui defender chhaih buaitu niin a sut kuakah a ṭhiante hun remchang an nei ṭhin a, goal erawh a khung belh thei ta bik lo a ni.
Hmabak Paraguay
Argentina hian an group match pathumna atan June 22, Thawhlehni zing dar 5:30 hian Paraguay an hmachhawn chhunzawm leh nghal dawn a, coach Lionel Scaloni-a'n player a la siksawi kual leh ngeiin a rinawm.
Tlarhnungah hliam dam hlim Cristian Romero a inlan thei tawh a, Atalanta defender hian Uruguay lakah minute 90 a khel thei a, zaninah pawh a inlan chhunzawm a rinawm. Tlarhma lamah Sergio Aguero chuan tun inelna bika a vawi khat nan bul a ṭan a rinawm bawk.
Aston Villa goal keeper Emiliano Martinez-a'n hmun nghet a chang chho tawh a, rinrawl a ni chhunzawm ang. Martinez chuan, "Tournament khelh hma kan match neih hoah khan ṭha taka khel chung siin chak kan harsat hle a nih kha.
"Chak duha tuihal chungin inelna kan hmachhawn a, a rah chu kan hmu ta a ni. Tlarhnung kan ngai pawimawh hmasa a, chumi hnuah goal khung lam kan tum leh. Chak tur chuan goal khung ringawt loin a venhim a pawimawh a ni," a ti.
Chile an chak
Alexis Sanchez la khel thei lo mah se Chile an kaltluang a, minute 10-na leka Guido Rodriguez goal khung an venhim theih avangin point thum hlu tak an hlawh chhuak; match hmabak erawh a hautak tawh dawn - Uruguay nen an inhmachhawn ang.
Group pakhata team panga awm zinga pali an tlang dawn a, chuvangin Chile leh Uruguay pawh tlang tura rin an ni. Mahse, quarterfinal-ah team ṭha an pumpelh theih nan a chung lama awm a pawimawh a, point thum hmuh an tum ve ve dawn.
Chile manager Martin Lasarte chuan, "Argentina lakah ṭha takin kan khel zo chiah a, chumi hnuah Bolivia hneh zui hi result duhawm tak a ni. Group match ni mah se team ṭha vek an nih avangin inthlahdul zeuh theih a ni dawn lo, Uruguay lakah pawh a ṭha thei ang berin kan inrem ang," a ti.
