Bucks leh Clippers an tlang Nets leh Jazz zinkawng a tawp
NBA champion tura rinkai leh team ṭha ni bawk Brooklyn Nets leh Utah Jazz ten conference semifinal an paltlang zo lo a, conference final-ah Milwaukee Bucks leh Los Angeles Clippers an lut thung.
Nimin zing khan Barclays Center-ah Milwaukee Bucks an lenglut a, chak lo tura rin zawk ni mah se over time an khelh zawh meuh chuan Brooklyn Nets lakah 115-111 in hnehna an chang, conference final an lut.
Eastern Conference semifinal lehlamah Atlanta Hawks leh Philadelphia 76ers ten tukin hian game 7 an khel a, a chak zawk hian conference final-ah Bucks hi an hmachhawn zui leh nghal dawn a ni.
Bucks an tho chhuak
Kevin Durant leh James Harden an neih avangin Nets hi chak tura rinkai an ni a, anmahni khelmual a nih bawk avangin an dinhmun a ṭha bawk; rinlawk ang ngeiin quarter hmasa pahnihah an chungnung nghal.
Mahse, Bucks an tlawm duh bik lo. Quarter thumnaah rawn sang fal lehin hun pangngaiah point 109 ve ve an hmu. Over time (OT) an khel zui, point 111 ve ve an neih leh hnuah Khris Middleton-a'n Bucks tan basket neiin point hnihin an sang hret.
Point 48 zet neitu Durant-a'n Nets tana umphak theihna remchang nei mah se a hun ṭha a hlah a, center Brook Lopez-a'n Bucks tan point neih belh lehin an chakna a ni chhunzawm nghal bawk a, rin hlawh lo zawkin hnehna an chang.
Bucks tana point 40 neitu, an thiampuipa ni bawk Giannis Antetokounmpo chuan, "Engkim mai kha a awlsam dawn lo tih hresa chungin kan lenglut a, ka sawi fo tawh angin mimala ṭhat ai chuan team ṭha tak neih a pawimawhzia kan hmu," tiin a sawi.
Jazz an tla
Western Conference lamah seeded pakhatna ni chungin Utah Jazz-in playff an khel a, regular season lama an khelh ṭhat angin an kal fawr chhunzawm thei lo. Jazz hi Los Angeles Clippers lakah 131-119 in an chak lo a, series-ah 4-2 in an tlawm.
Semifinal game hmasa pahnihah Jazz hian hnehna changin series-ah 2-0 in hma an hruai fal nghal. Mahse, team thawhhona ṭha hmang thiam Clippers hian game hnuhnung panga zinga pali ngawt an lak avangin a vawi khat nan conference final an lut.
Clippers tana point 39 neitu Terance Mann chuan, "Ka ṭhiante khan vanneihna zawnga shot turin min au ṭhin a, kan chak theihna a nih beiseiin ka theihtawpin ka bei chhunzawm a ni," tiin a sawi. LA Clippers hi quarter thumnaah point 25 zetin hniam mah se huaisen takin an tho chhuak a ni.
Nizan khan Los Angeles Clippers hian conference final game 1-ah Phoenix Suns an hmachhawn zui leh nghal. Suns hi seeded pahnihna ni chunga playoff khel an ni a, regular season an hman dan chhut chuan NBA Finals khel phak zawk tura rinkai an ni ang.
