Thiem-a'n Olympic khel dawn lo

Dominic Thiem chuan Tokyo Olympic khelh a tum loh thu a ti chiang a, tun thla tawpa khelh tur Wimbledon lamah erawh inlan ngei a thum thu a sawi lang nghal bawk.

Austrian tlangval Thiem hian kuminah beisei a la phak lo, vawi kua chak tawhin ṭum riat ngawt a tlawm tawh. Final vawi hnih a khelh tawhna French Open 2021-ah pawh hneh nei loin a tla.

Kum 27 mi Thiem chuan, "Ka team lam nen ngun taka kan ngaihtuah hnuin thutlukna hrehawm tak kan siam, vanduai thlak takin Tokyo Olympic ka khel thei dawn lo," tiin Japan khawpuia a kal loh tur thu a sawi.

Beijing Olympic champion Rafael Nadal pawhin infiamna khawmpui lian a hmachhawn loh tur thu a lo sawi tawh. World number 1 Novak Djokovic erawhin Grand Slam pali bakah Olympic khelh ngei a tum thung.

Hri leng vangin infiamna hi tun hma angin a kalphung pangngai angin a kal thei rih lo a, tournament aṭanga inhnukdawk an tam ṭhin hle. Wimbledon 2016 finalist Milos Raonic pawhin grass court inelna lian a hmachhawn loh tur thu a lo sawi tawh.