Ukraine nge tling dawn Austria?

Euro 2020 group C aṭangin Netherlands pakhatna an ni tawh a, North Macedonia an tla tawh. Hemi a nih avang hian zanin dar 9:30-a inkhel tur pahnihah Netherlands leh North Macedonia aiin Ukraine leh Austria inkhel turin ngaihven a hlawh zawk ang.

Ukraine leh Austria te hi an point hmuh zat leh goal difference inang chiah mah se goal khung tam zawk Andriy Shevchenko hote dinhmun a ṭha hret. Team pahnih hi an inhnehtawk a nih chuan Ukraine hi pahnihna a ni ang a, Austria tan erawh last 16 lut turin pathumna ti ṭha pali zinga tel a ṭul dawn a ni.

Attacking football
Ukraine-in draw chiah mamawh tawh mah se Andriy Shevchenko hote an nih miau avangin attacking football an khelh a rinawm. Match hmasa lam ang thoin goal nawr kawngah Roman Yaremchuk leh Andriy Yarmolenko te an pawimawh leh dawn a, Austria tlarhnung tan ven uluk an ṭul dawn a ni.

Austria erawhin loh theih loin attacking football an khelh a ngai dawn. Chutihrualin point li hmang hian team pahnih hi last 16 an luh ve ve theih dan a awm a, Austria coach Franco Foda-a'n risk lain game a ti dul thei bawk.

Netherlands nen an inkhelh ṭumin Austria innghahna David Alaba-a'n penlaty a chawi a, Bayern Munich aṭanga Real Madrid zawmtu hian Ukraine nen ṭha zawka a khelh a ṭul ang.

Eng nge an sawi?
Austria coach Franco Foda chuan, "Kan kutah engkimah a awm. Marko Arnautovic-a'n hremna a hmang zo a, Ukraine nena kan 'final' khelh tur atan kan inpeih," tiin a sawi.

Ukraine goalkeeper Georgiy Bushchan chuan, "Kan ram ti hmingṭha turin engmah kan la ti lo. Chawimawina leh huatna inkar hi a zim em em a, chuvangin match pawimawhah hian kan fimkhur a ṭul a ni," tiin a sawi.

Oranje hi...
Netherlands-in Frank de Boer kaihhruaina hnuaiah match hmasa pahnih aṭangin last 16 an lut nghal a, group match hnuhnung bera hian player la inlan lo pahnih khat a luhtir a nih pawhin a mak lo ang.

North Macedonia tan erawh hun tawp a ni dawn a, chutihrualin captain Goran Pandev tan match hnuhnung ber a nih theih avangin ram legend tan an theihna zawng zawng an chhuah ang.

Kum 37 mi Pandev hi North Macedonia tan chuan mi bik a ni a, Serie A club Lazio, Inter Milan, Napoli leh Genoa te a hming a chher. Ram tan match 121 khel tawhin goal 38 a khung tawh a, Euro 2020 an khelh theihna tura goal pawimawh khungtu a ni.

Inlan tura beiseite

Ukraine Vs Austria
Venue : National Arena, Bucharest
Ukraine: Bushchan; Karavaev, Zabarnyi, Matviyenko, Mykolenko; Malinovskyi, Stepanenko, Zinchenko; Yarmolenko, Yaremchuk, Tsygankov
Austria: Bachmann; Dragovic, Alaba, Hinteregger; Lainer, Sabitzer, X Schlager, Grillitsch, Ulmer; Baumgartner, Arnautovic

North Macedonia vs Netherlands
Venue : Johan Cruyff Arena, Amsterdam
North Macedonia: Dimitrievski; S Ristovski, Velkovski, Musliu, Nikolov; Ademi, Alioski, Bardi, Spirovski; Pandev, Elmas
Misses next match if booked: Alioski, Avramovski, Trajkovski, Velkovski
Netherlands: Stekelenburg; Dumfries, De Ligt, Ake, Blind, Van Aanholt; Klaassen, Gravenberch, Wijnaldum; Depay, Malen