Euro 2016 - Tuten nge Last 16 lut dawn?
European Championship 2020 group match hnuhnung ber chu nizan aṭang khan khelh ṭan a ni a, team 24 aṭangin team 16-in group stage an paltlang ang.
UEFA hnuai inelnaah chuan point inang hmu an awm a nih chuan goal difference en loin head to head hmasak ṭhin a ni a, Euro 2020-ah pawh hian head to head a pawimawh dawn. Point hmuh inzat team-te thliar hran nan hian tehfung hrang hrang siam a ni a, last 16 lut theih dan hre tel tur chuan dan hriat tel a tul ang.
Group B
Russia (3) vs Denmark (0); Finland (3) vs Belgium (6)
- Belgium-in last 16 an lut tawh a, pakhatna ni turin draw chiah an mamawh tawh.
- Russia tan last 16 lut turin chak a ngai a, Finland-in Belgium laka point thum an hmu lo a nih chuan draw chauh pawh a tawk ang.
- Finland tan last 16 lut turin chak a ngai a, Russia-in Denmark an hneh lo a nih chuan draw a tawk.
- Denmark tan pahnihna ni turin Russia an hneh a ngai a, Finland-in Belgium an hneh loh a ngai bawk. Chumi zawhah chuan goal difference en a la ngai cheu dawn.
Group C
North Macedonia (0) vs Netherlands (6),
Ukraine (3) vs Austria (3)
- Netherlands hi group hmahruaitu nichungin an tling tawh. Ukraine leh Austria te an hneh tawh avangin head to head-ah an ṭha zawk.
- Ukraine tan pahnihna ni turin draw a tawk.
- Austria tan pahnihna ni turin chak ngei a ngai.
- North Macedonia a sang pahtum zingah an tel thei tawh lo a, an tla tawh.
Group D
Croatia (1) vs Scotland (1),
Czech (4) vs England (4)
- Czech Republic-in England lakah point an hlawh chhuak a nih chuan hmahruaitu an ni dawn. An chak lo a, Scotland-in Croatia an hneh bawk chuan pahnihna an ni ang. Pathumna nih theih dan awm chu an chak loh bakah Croatia-in Scotland an hnehin a ni a, hemi zawh hian goal difference en a la ngai tho.
- England-in last 16 lut turin draw chiah an mamawh a, an chak lo a nih pawhin Scotland an chak loh chuan knockoutstage an lut ang. Pakhatna ni tur chuan Czech Republic an hneh a ngai. Pathumna an nih theih dan chu Scotland-in Croatia an hnehin a ni a, hemi zawh hian goal difference en a la ngai tho.
- Croatia-in last 16 beseina nei turin Scotland an hneh ngei a ngai a, point thum an hmu a nih chuan pathumna ti tha pali zingah awm theih dan a awm. Chutihrualin goal difference hmangin Czech Republic chungah awmin pahnihna an la ni thei bawk.
- Scotland pawh an chak a nih chuan pathumnaah an la awm thei a, goal difference hmangin England chungah awmin pahnihna an la ni thei bawk.
Group E
Slovakia (3) vs Spain (2),
Sweden (4) vs Poland (1)
- Sweden-in Poland laka point an hmuh chuan last 16 an lut dawn. Sweden hi an chak lo a, Slovakia leh Spain te an inhnehtawk a nih chuan Sweden, Slovakia leh Poland te pathum intum kualna aṭangin pakhatna aṭanga pathumna hi thliar hran an ni ang.
- Slovakia-in Spain an hneh chuan last 16 an lut ang. Inhnehtawk chunga last 16 lut tur chuan Sweden-in point an hmuh a ṭul ang.
- Spain-in Slovakia an hneh chuan last 16 an lut dawn. An in draw a, Poland-in Sweden an hneh loh bawk chuan pathumnaah an awm thei bawk.
- Poland-in pahnihna ni chunga last 16 lut turin Sweden an hneh a ngai a, Slovakia leh Spain an inhnehtawk loh a ngai bawk. An lo inhnehtawk erawh chuan Sweden, Poland leh Slovakia ten point li ṭheuh an hmu dawn.
Group F
Portugal (3) vs France (4),
Germany (3) vs Hungary (1)
- France-in point an hlawhchhuah chuan last 16 an lut dawn a, Germany leh Hungary an inhnehtawk a nih chuan chak lo pawh ni se last 16 an lut tho ang. Pakhatna ni turin chak a ngai a, draw chunga pakhatna ni tur chuan Hungary-in Germany lakah point an hmuh a ngai. France hi an chak lo a, Hungary an chak bawk chuan pahnihna hi overall goal difference hmanga zawn tur a ni.
- Germany hi an chak a nih chuan last 16 an lut dawn a, inhnehtawk chunga last 16 lut tur chuan France-in Portugal lakah point an hmuh a ngai. Pakhatna ni tur chuan an chak a ngai a, France an chak loh a ngai. Germany hi an inhnehtawk a, France an chak lo a nih chuan pathumna a ni dawn a; an chak lo a, Portugal an chak loh bawk chuan pathumna an ni bawk ang.
- Portugal tan last 16 lut turin chak a ngai a, inhnehtawk chunga last 16 lut tur chuan Germany an chak loh a ngai. Portugal tan pakhatna ni turin chak a ngai a, Hungary-in Germany lakah point an hlawhchhuah a ngai bawk. Portugal hi an chak lo a, Germany an chak lo bawk a nih chuan palinaah an awm dawn.
- Hungary tan pahnihna ni turin chak ringawt a tawk lo a, Portugal an chak loh a ngai bawk. Hungary hi an chak a, France an chak lo erawh chuan pahnihna hi overall goal difference hmanga zawn tur a ni. Hungary hi an chak a, Portugal leh Germany an inhnehtawk chuan pathumnaah an awm thei bawk.