Gilmour ‘positive’ Scotland tan a ‘positive’ lo!
Scotland boss Steve Clarke-a'n, "Cup final-in min hmuak a ni," tiin Croatia nena an inkhel tur a thlir lawk a, zanin dar 12:30-a team pahnih inkhel tur hi a hmuhnawm dawn.
Group D-ah Croatia leh Scotland-in point khat ve ve an nei a, zanina chak lo zawk tan chuan puanthuah tela mahni in lum lam pan mai a ngai tawh dawn - hei hi a thlen an duh lo ang.
Hetiang boruak karah hian Scotland-in chanchin duhawm lo an nei a, England laka khel ṭha em em Billy Gilmour chuan Covid-19 a kai tih hmuhchhuah a ni.
Gilmour chu
Euro 2020 ṭan hma khan Gilmour hi inhliam emaw Covid-19 emaw kai ni ta se, Scotland tan channa a tling lo. Mahse, England lakah Scotland boss Clarke-a'n rin loh takin bul a rawn ṭantir a, a khel ṭha takzet.
Chelsea midfielder khelh dan chu media zawng zawng fak rawn a ni - mahse, vawiina thu thar erawh Gilmour-a'n Covid-19 a kai thu a ni a, Croatia a hmachhawn thei dawn lo.
Kum 20 mi midfielder hi dan angin ni 10 chhung a inkhunghran a ngai dawn a, Scotland hian Croatia hnehin last 16 lut ta pawh ni se knockout round-ah pawh inlan a beiseiawm lo tihna a ni.
Vanduai vannei
Gilmour-a'n Covid-19 a kai avangin hlauhthawnna lian tak a awm a, mahse, he thu buatsaih a nih thleng hi chuan Scottish player dang zingah positive an awm lo a, tun dinhmunah chuan midang lo awm hnaih a neih loh avangin a hlauhthawnawm loh.
Scotland tan England laka bench-a ṭhu Stuart Armstrong chu Gilmour a awm dawn loh takah chuan starting XI-a lo kir leh tura ngaih a ni a, he team hian defender Kieran Tierney, Captain Andy Robertson leh England laka defender anga chhawr, Manchester United midfielder Scott McTominay-te an nei bawk.
A tawi zawnga sawi chuan Croatia hneh turin Scotland an ṭha tawk a, England laka an khelh dan anga an khel chhuak thei a nih phawt chuan Croatia an hneh thei ang.
Beisei phak lo
Euro 2020-a beisei phak lo pawl chu Croatia tih loh rual a ni lo a, match hmasa berah England an ngam loh hnuin Czech Republic an inhnehtawkpui - zaninah an insiamṭha a nih loh chuan puanthuah tel a ngai dawn a, mualphona tawp khawk a ni ang.
Croatia tan Rangers left back Borna Barisic chuan hliam vangin an match hmasa pahnih a khel thei lo a, zanina inkhel tur erawhin a dam tawh. Beisei phak lo Ante Rebic chu bench lamah a kir tawh a rinawm a, Dinamo Zagreb forward Bruno Petkovic chu a hmun ruak luah tura ngaih a ni.
Marcelo Brozovic chu Czech lakah bench-a dah ni mah se coach Zlatko Dalic chuan Scotland laka bul a ṭan tur thu a sawi a, an ṭhat dan berin Scotland hmachhawn an tum - Dalic chuan, "Kan theihna sang berin kan khel ang," a ti a, chak loh a duh lo.