Grass court-a title latu Berrettini

Queen's Club Championship chu Pathianni zan khan khelh zawh niin, Italian tlangval Matteo Berrettini chuan Cameron Norrie lakah 6-4, 6-7(5), 6-3 a hnehna changin nomawi a chawi.

Kum 25 mi Berrettini-a'n a ball vuak na leh forehand ṭha tak a chhawr ṭangkai a, inkhel inhnehtawk takah a vannei zawkah ṭangin tennis a khelh hun chhunga a nomawi pangana a hlawh chhuak.

World number 9 Berrettini chuan, "Hmun danga ka champion tawhna te khan min lo hrethiam se, hlawhtlina ka chan tawhah chuan tun ṭuma mi hi ka tana hlu leh ropui ber chu a la ni. He inelna hi ka naupan lai aṭanga ka en ṭhin a nih avangin ka ngai hlu," a ti.

Queen’s Club-ah hian kum 1985 khan Boris Becker chuan a vawi khat inlannaah nomawi a chawi thei a, ani hnuah chuan Berrettini hi tournament khelh hmasak bera champion nghal thei a ni leh chiah.

Berrettini chuan, "Chawlh kar duhawm tak a ni, nomawi kan chawi a nih chuan lawmna tur a ni a, kan khel ṭha tihna a ni. Tun ṭuma ka lawmna tizualtu chu match tinah hma ka sawn zel kha a ni," tiin a sawi.

June 26 aṭangin Wimbledon an khel ṭan dawn a, grass court inelna lianah hian Berrettini hi inrintawkna sang tak nen a inlan thei ang. Player langsar leh ṭha dang an tel dawn avang erawh chuan a awlsam tawh dawn lo.

Season hmasa khan hri leng vangin Wimbledon hi an khel thei lo, kuminah erawh a hmuna entu awm chungin an khel dawn, mipa leh hmeichhe singles final bik phei chu stadium khatin entu an awm thei tawh dawn a ni.