Hnehna nen Marquez a inlar leh ta

Ban ruh hliam vangin hun rei tak chhung a buai a, tunah chuan a dam chiang tawh tih chu thil tih hmangin a lantir leh ta. Pathianni tlaia tlan zawh tak MotoGP German Grand Prix-ah Marc Marquez a chak ber.

Nikum July thla khan Marquez hi a inhliam a, a tan season hmasa kha a tawp nghal. Tun season tir lamah a inlan thei lo chhunzawm, a intlansiak theih hnuah ngai a la awh thei lo.

German GP an tlan hma khan hliam a neih hnua inelna a hmachhawn leh turah chuan a inpeih ber ṭum a nih thu a sawi lawk. A tlankawng hman thiam Sachsenring-ah hian vawi 11 zet a chak ta a, kum 2019 hnu lama a chak lehna hmasa a nih avangin a lawmawm zual ang.

MotoGP vawi ruk champion tawh Marquez hnungah hian Miguel Oliveira leh, tun season championhsip hmahruai mektu Fabio Quartararo te an thleng; champion lai Joan Mir chu pakuanaah thlengin atan nomawi humhim a harsa tawh dawn.

Honda rider Marquez chuan, "Hliam vanga ka chawlh lai kha chuan, engtik niah emaw chuan a hma aia ṭha zawkin ka lo kir leh ang tih ka ngaihtuah ṭhin. Inelna ka rawn hmachhawn leh tir lamah erawh kha chuan ka rilru a danglam hle.

"Ṭha taka kir tura inbeisei ni mah ila tun hma lam ka phak lo hle tih ka inhria, amaherawhchu beidawng mai loin ngai ka awh leh hun ka nghak hram hram a, tunah chuan ka nghak chhuak leh dawn ta niin ka hria," tiin a sawi.

Yamaha rider Valentino Rossi erawhin beisei ang result a nei lo. Italian star hi 14-naah a thleng hram a, season a hman dan chhutin atan nomawi beisei ngam chi a ni tawh lo - a vanglai hun a liam tawhah a ngaih theih.

Bike intlansiakna sang ber hi kuminah vawi riat an tlan tawh a, point 131 hmutu Quartararo-a'n hma hruaiin amah hnaih bertu Johann Zarco aiin point 22-in an sang fal zawk. June 27, Pathianni hian TT Circuit Assen-ah Dutch GP an tlan leh ang.