Italy an chak, Wales an tlang

Pathianni zanah Italy-in Wales 1-0 in an hneh a, Matteo Pessina-a'n goal awmchhun a khung. Euro 2020 group A-ah Azzuri-in match thum aṭangin point kua an hmu a, goal sarih khungin goal an chhuah lo a, hmahruaitu an ni.

Gareth Bale-a telna Wales-in Italy hneh lo mah se anmahni ang bawka point li hmu Switzerland aiin goal difference-ah an ṭha zawk a, pahnihna niin last 16 an lut.

Team thar
Inkhelh hmain Italy-in last 16 an lut tawh a, hmahruaitu ni turin draw a tawk. Robert Mancini-a'n player hahdamtirna hunah a hmang a, Switzerland an hneh ṭum aṭangin player pariat ngawt a thlak.

Azzuri tana bul ṭantu zingah Marco Verratti a tel a, PSG midfielder erawh inhliam vanga match hmasa pahnih khel lo a ni. Wales pawhin Turkey hnehtute aṭangin player pathum an thlak.

Yellow card hmu pathum Ben Davies, Chris Mepham leh Kieffer Moore te aiah Chris Gunter, Ethan Ampadu leh Neco Williams te an inlan.

Goal khungtu Pessina
Italy-in tlarhmaah mi thar pathum Federico Chiesa, Federico Bernardeschi leh Andrea Belotti te an dah chungin an goal nawr a na tho. Juventus forward Chiesa a thawkrim a, Torino striker Belotti goal hmaah a hlauhawm bawk.

Wales pawhin goal khungna chance an nei a, defender Chris Gunter-a ball tauh chu a lut teuh hle. Kum 31 mi Gunter hian ram tan match 102 a khelh tawhah goal a la khung lo.

Minute 39-naah inkhel thununtu Azzuri-in goal an khung a, freekick aṭanga lut a ni. PSG midfieler Verratti pet chu Matteo Pessina-a'n mawi zeta khawih kawiin goal kilah tak a lut.

Kum 24 mi Pessina hi Serie C club Monza aṭanga inzir chhuak a ni a, club tenau tana loan hmanga a khelh kual hnuin Serie A club Hellas Verona leh Atalanta-ah hming a chher. Season liam ta khan Pessina hian Atalanta tan league match 28-ah inlanin goal hnih a khung a, club ai hian Mancini hnuaia a record a ṭha zawk.

Pessina-a'n ram tana a khelh hmasak ber chu November 11, 2020 a ni a, Estonia 4-0 in an hneh. Kuminah Pessina hi ram tan vawi ruk a inlan a, goal thum a khung.

Red card Ampadu
Group A inkhel dangah Switzerland an che ṭha a, halftime-ah Turkey lakah 2-0 in hma an hruai. Wales hian goal an chhuah belh a nih chuan pathumna ni thei an nih avangin Rome-a inkhel a nung sawt a, minute 55-naah defender Ethan Ampadu-a'n ṭul lo taka Bernardeschi a tlawh avangin red card a hmu.

Player 10-a khel Wales an hlau-thawng a, amaherawhchu Turkey tan Irfan Can Kahveci-a'n goal a khung ve lehnghal avangin Switzerland nen goal difference-a an inthlauhna chu goal hnih a ni chho leh a, Dragons dinhmun a ziaawm.

Italy-in goal khung belh thupui berah an nei tawh lo a, player khelh kim an ngaih pawimawh zawk avangin goal dang a lut tawh lo.

Hmabak chu
Italy-in Wembley Stadium-ah last 16 an khel dawn a, an khingpui tur hi group C pahnihna niin Ukraine emaw Austria emaw an ni dawn a, nizan lamah tihchianin a awm ang.

Wales hian group B pahnihna an hmachhawn dawn. Dragons hmachhawn tur hi Belgium, Russia, Finland leh Denmark te an la ni thei vek a, he thu i chhiar meuh chuan an tumpui tur a hriat tawh ang.

Khua a lum em em a, chutichung chuan kan khel ṭha hle a ni. Goal khat aia tam khung thei tur kan ni hialin ka hria. Player thlak nual mah ila kan nihna kan pholang thei kha ka lawm. Ka player-te kha an tih turah an chiang a, kan tum a danglam lo. - Roberto Mancini Italy coach

Game nung ṭha tak khelh a, goal chance awm tam tir kha kan duh lo. Goal hnih aia tam chhuah loh tumin ruahmanna kan siam a, player pathum tlarhmaa kan dah kha chu counter attack atan a ni. Player 10-a kan khelh hnu kha chuan engkim a harsa a ni. - Robert Page Wales coach

Italy - Match 11 an chak zawh tawh a, goal an chhuah lo.
2-0 Estonia
2-0 Poland
2-0 Bosnia
2-0 Northern Ireland
2-0 Bulgaria
2-0 Lithuania
7-0 San Marino
4-0 Czech Republic
3-0 Turkey
3-0 Switzerland
1-0 Wales

Sirigu-a'n Donnaruma a thlak
Italy leh Wales inkhelh ṭumin Azzuri manager Roberto Mancini-a'n minute 89-naah keeper Gianluigi Donnarumma aiah Salvatore Sirigu a thlak.

Mancini hian Dragons an hmachhawn ṭum hian starting eleven thar hlak tia sawi theih a hman bakah Gaetano Castrovilli, Francesco Acerbi, Bryan Cristante leh Giacomo Raspadori te bench aṭangin an lut bawk.

Player 26 squad aṭangin third goalkeeper Alex Meret chiah a inlan tawh lo. Roberto Mancini-a'n player a luh kim tir phenah hian chanchin ngaihnawm tak a awm. Italy-in 1990 World Cup an thleng a, Azzuri hi champion rinkai zinga mi an ni a, kum 25 mi Mancini pawh a tel. Azeglio Vicini kaihhruai team hian semifinal hial thlengin pathumna ni mah se Mancini hi vawi khatmah a lut lo.

Azzuri forward dang Gianluca Vialli, Andrea Carnevale, Salvatore Schillaci leh Aldo Serena te erawh an lut vek. Italian football writer Nicky Bandini chuan, "Mancini-a hun tawn hrehawm ber zinga mi chu 1990 World Cup-a minute khatmah a nei lo hi a ni," tiin a sawi.

Kum 56 mi Mancini-a'n player a nih laia a hun tawn hrehawm hi a player-te chungah thlentir a duh lo a, hemi vang hian kum 34 mi Salvatore Sirigu hi khelhna hun a peah ngaih a ni a, fak a hlawh hle.

Player inlante

Italy: Donnarumma (Sirigu 89); Tolói, Bonucci (Acerbi 46), Bastoni, Emerson; Pessina (Castrovilli 87), Jorginho (Cristante 75), Verratti; Chiesa, Belotti, Bernardeschi (Raspadori 75)

Wales: Ward; Gunter, Rodon, Ampadu; C Roberts, Allen (Levitt 86), Morrell (Moore 60), N Williams (Davies 86); Bale (Brooks 86), Ramsey, James (Wilson 74)