Dembele tan Euro 2020 a tawp

France leh Hungary inkhelh ṭumin minute 57-naah Ousmane Dembele-a'n Adrien Rabiot a rawn thlak a, Barcelona forward hi inhliam vangin minute 87-naah Thomas Lemar-a'n a thlak .

Nimin khan French Football Federation-in thuchhuah an siam a, hliam vanga a inlan theih tawh loh tur thu a sawi. FFF chuan, "Pathianni zan khan Budapest-a damdawi inah Ousmane Dembele hi X Ray a ni a, inkhel thei a ni tawh lo. Team doctor Franck le Gall leh coach Didier Deschamps te nen sawi ho a ni a, tun inelnaah a inlan thei dawn lo," tiin thuchhuah an siam.

Deschamps hian tlarhmaah Antoine Griezmann, Karim Benzema leh Kylian Mbappe te bul ṭan turin a dah a, bench aṭanga lut turin Olivier Giroud, Kingsley Coman leh Wissam Ben Yedder te an la awm bawk.

Les Bleus hian an match hnuhnung berah June 23, Nilaini zan hian European champion Portugal an hmachhawn dawn a, group F aṭangin team tling leh tla an la awm loh avangin inkhel hmuhnawm bik a ni ang.