Hamilton hmaah Verstappen a thleng

Mercedes driver chhuanvawr, vawi sarih zet Formula 1 champion ni tawh Lewis Hamilton hmaah Max Verstappen a thleng. Dutch tlangval hian French Grand Prix-ah hnehna a chang a, driver championship table lamah hma a hruai chhunzawm bawk.

Le Castellet-ah hian 2018 leh 2019 khan Hamilton-a'n hnehna a chang a, nikum khan hri leng vangin an tlan thei lo. A sulhnu en chuan Pathianni zana intlansiak an neih hma pawh khan Lewis hi chak leh tura rinkai ber a ni.

Mahse, season tir lama Spanish GP an tlan letling khan thil a thleng ve ta. Spain-ah khan Hamilton-a'n Max hi hun tawp dawnah a hneh, tunah erawh a tawp lam inelna boruak sang lai takah Verstappen a chungnung ta.

Red Bull driver Verstappen chuan, "Intlansiak tir lamah khan thli a thaw nasa a, car khalh a harsa hle. Inelna ṭhenkhat chu harsa lutuk loa tlan zawh mai a awm, ṭhenkhat erawh boruak dinhmun a zira awlsam lo leh harsa a awm thung.

"Tun ṭumah pawh khan thli vangin a boruak a danglam a, driver kan inel tawk hlawm avangin a harsa zual bawk. Hetianga hnehna chan chu a hluin a ropui zual bik a ni," tiin a sawi.

Champion lai ni chungin Hamilton-a'n season a hmang a, inelna tir lamah a che ṭha bawk. Mahse tun hnaiah erawh a elpui Verstappen a phak lo, an inkarah point 12 a awm a, season tawpa nomawi chawi zawk tur rin thiam a harsa ta hle.

Britain tlangval Hamilton chuan, "Team lamin hna kan thawk ṭha thawkhat, mahse tun ṭum atan chuan a tawk zo lo a ni. Tuna kan intlansiak hian Red Bull ṭhatzia a lanchhuah tir niin ka hria.

"Danglamna thlen tumin kan tih theih hrang hrang kan hmang, amaherawhchu kan enpui kha an khawng tlat a, tihsual an neih duh bawk si loh avangin kan tan kawng a inhawng ta lo," tiin a sawi.