Ruahsurin WTC final a ti buai

World Test Championship final chu nimin khan ruahsurin a tibuai nawn a, vawiin hian a ni ngana khelh a ni ang.

WTC final hi India leh New Zealand ten June 18, Zirtawpni aṭang khan Ageas Bowl, Southampton-ah an khel ṭan a, ni hmasa ber hi ruahsur vangin khelh thei a ni lo.

Ṭhumvawrah New Zealand an chak a, vawm hmasak an thlang. India hi an bat hmasa a, first innings-ah run 217 an siam. Captain Virat Kohli-a'n run 44 a vaw chhuak a, vice captain Ajinkya Rahane-a'n run 49 a siam ve bawk.

New Zealand bat hun a thleng a, opener Tom Latham (30) leh Devon Conway (54) ten bul an ṭan ṭha a, nimin lama an inkhel thei a nih chuan captain Kane Williamson (12*) leh Ross Taylor (0*) ten India batsaman an hmachhawn ang.

Black Caps hian run 101 siam tawhin batsman pahnih chauh la chan mah se second innings khelh tur a la awm avangin chak a harsa dawn. Vawiin hian ni ngana leh tawpna ber khelh a ni dawn a, nimin tlai laia boruak awm dan thlirin an inhnehtawk a rinawm tawh zawk.