NBA Playoff Match hmasa berah Suns an chak

Devin Booker-a'n a vawi khat nan basketball inelna sang ber NBA huangah triple-double a nei a, a hna thawh ropui hmang hian Phoenix Suns chu Los Angeles Clippers lakah 120-114 in hnehna a chanpui.

Nimin zing khan Western Conference final game 1 khelh niin Suns an chak. June 23, Nilaini zing dar 6:30 hian game 2 an khel chhunzawm leh ang, inelna hi best of seven series a nih avangin chak turin vawi li hnehna chan a ngai dawn.

Talking Stick Resort Arena-a inkhelah Booker chu player langsar ber a ni. Suns player duhlai hian 40 point, 13 rebound leh 11 assist a nei a, an player pawimawh Chris Paul inlan theih loh karah a hmun ruak a lo hnawh khat hneh hle.

Guard Paul hi rinrawl tur a ni a, a theihna a san bakah player naupang zawkte fuihtu pawimawh a ni. Mahse, kum 36 mi hi hri leng kaihhnawih vangin a inlan thei lo. Clippers lam pawhin Kawhi Leonard chu khup hliam vangin an chhawr thei bik lo.

Team pahnih an inbei tawk hle, hun chanve hma lamah phei chuan vawi 18 ngawt hmahruaitu an inthlak; an inlehthal tawn zak zak tihna a ni. A tawp lamah erawh regular season hmang ṭha zawk Phoenix an chungnung.

Eastern Conference lamah Atlanta Hawks leh Milwaukee Bucks ten final an lut. June 24, Ningani zing dar 6:00-ah game 1 an khel ṭan ve thung ang. Conference champion pahnih hian NBA Finals an khel chhunzawm leh dawn a ni.