A hmunah Olympic entu awm thei dawn

Tokyo Olympic chu a hmunah entu an awm thei dawn a, mahse inkaihhruaina khauh tak zawm a ngai dawn; hri leng vanga boruak ṭha lo a thleng palh a nih chuan entu awm tura sawi pawh hi ṭhulh leh theih a la ni ang.

Japan rama infiamna khawmpui lian neih tur hi ram dang aṭang chuan entu an awm thei dawn lo. Tualchhung mipui tan erawh stadium-a leng zat aṭanga chhutin 50% an lut thei dawn a, entute hian hmai an tuam tur a nih bakah bengchhen erawh phal a ni dawn lo.

Tokyo 2020 organising committee president Seiko Hashimoto chuan, "Hri kai thar an la awm zel, mahse hri leng hi chu khawvel pumin a hmachhawn lai a ni a, keini pawhin kan hmachhawn a ngai ve bawk.

"Ram dangte pawhin hri leng karah infiamna ṭhenkhat chu a hmuna entu awm chungin an kalpui thei tawh a, keini pawhin fimkhur tak chung siin kan theih ve ngei hi kan ring tlat a ni," tiin a sawi.

Kar hmasa khan Japan prime minister Yoshihide Suga chuan Japanese mipuite chuan Olympic chu TV aṭanga en an duhzawk a rin thu a lo sawi tawh a, Olympic hi a hmuna en an phal a nih pawhin mi tam tak chuan punkhawm duh loh vangin mahni in aṭangin an en chu a rinawm.

Japan ramah hian coronavirus vangin hun rei tak chhung inkharkhipna kalpui a ni. Inelna neihna tur Tokyo-ah chuan Pathianni aṭang khan inkharkhipna hi an hlip a, nunphung pangngai a nun theih an beisei mek.