Peru-in Colombia an hneh

Copa America 2021 khelh laiah Peru beiseina a nung. Nimin zing Group B inkhelah Peru hian team ṭha zawk Colombia chu 2-1 in an hneh a, quarterfinal lut thei turin beiseina an nei chhunzawm zel.

Olimpico Stadium, Goiania-a inkhelah Peru tan Sergio Pena chuan minute 17-naah goal hmahruai a khung a, Colombia lamin Miguel Borja hmangin second half-ah sut mah se defender Yerry Mina-a'n anmani lamah a tih luh avangin Peru an chak.

Ricardo Gareca enkawl Peru hian match hnih an khelh aṭangin point thum an hmu a, table-ah pathumna dinhmun an luah. An chungah hian match thum aṭanga point li nei Colombia leh vawi hnih chak tawh Brazil te an awm.

Peru hian an match hmasa berah Brazil chu 4-0 ngawtin an ngam lo a, an mualpho chhunzawm mai pawh a rinawm. Mahse Colombia an hneh theih tak avangin quarterfinal an luh a rinawm leh ta zawk.

Peru defender Renato Tapi, "Colombia kan hneh hian kan kalkawng tur thui tak min sialsak niah ka ngai, theihna kan nei tih pawh a nemnghet. Chutih rualin engtianga thui nge kan kal theih tih chu a pawimawh lai a ni," tiin a sawi.

Copa America-ah hian South American ram 10 an inel a, group pahnihah panga ve vein ṭhen hran an ni. An inkhelh kual hnuah a sang paliin quarterfinal an lut dawn, group pakhat aṭangin team pakhat chauh tla dawn mah se an inel tawk hlawm avangin chetsual theih a ni.

Group B
Results & Fixtures
Venezuela 2 - 2 Ecuador
VEN : Edson Castillo 51';
    Ronald Hernandez 90+1'
ECU : Ayrton Preciado 39';
   Gonzalo Plate 71'

Colomboa 1 - 2 Peru
COL : Miguel Borja 53' (P)
PER : Sergio Pena 17';
    Yerry Mina 64' (OG)

June 23, Nilaini Zan
Ecuador 02:30 AM Peru

June 24, Ningani Zing
Brazil 05:30 AM Colombia